Krismas hmaa hlawh pe turin sorkar phût

Mizoram Pradesh Congress Committee (MPCC) chuan thu­chhuah siamin, ni za inhlawhna tia hriat Mahatma Gandhi National Rural Employment Gua­rantee Scheme (MGNREGS) hnuaia inhlawhte chu Mizoram sorkarin hun rei tak chhung an hlawh a pe thei tawh lo niin an tarlang a; Krismas hma ngeia hlawh pe turin sorkar an phût.

MPCC tarlan danin, Khawzawlah chuan August 2019 aṭangin MGNREGS hlawh an la mumal tawh lo a, August thlaah ni sarih, September-ah ni 14 leh October-ah ni 12 inhlawhte'n an thawh hlawh tun thlengin an la la thei lo. Khawzawlah hian job card 2,670 a awm a ni.

Ngopa RD Block hnuai­a mite pawhin September leh October thla chhunga an inhlawhnate tun thlengin an la thei lo a; Thingdawl RD Block hnuaia khaw ṭhenkhat pawhin August thla aṭangin hlawh an la thei tawh lo a, August-ah ni 12, September-ah ni 8 leh October-ah ni 6 chhung an inhlawh. Khaw dangah­te pawh hlawh la thei lo hi an tam hle niin MPCC chuan an tarlang.

Congress party chuan, MGNREGS hnuaia inhlawhnaa an thawh hlawh an lâk theih loh vangin chhungkaw tam takin an buai phah mek tih an sawi a, "Hei hi MNF sorkar­in sum leh pai an enkawl thiam­ loh vang leh a tlaran zawng ringawta a khawsak zel vangah kan ngai a, Krismas hma ngeia an thawh hlawh pe turin kan phût a ni," an ti.

MNF sorkar chu sum leh pai enkawlna lamah a tâlbuai nasa hle nia sawiin MPCC chuan, "State sorkar sum lak luhna tur leh thawh chhuahna tur an ngaihthah a, thawh chhuah tam aiin central aṭanga a awmsa dil chhuah tam lamah ṭan lâk an tum a, kutdawh sorkara insiam an tum a ni ber," an ti a; an tum anga sum an dil chhuah theih loh avang leh lak luhna dang nei loa a awm sa an hman zawh zel avangin an tâlbuai chho ta niin an tarlang.