MNF party-in AMC inthlana An candidate turte an puang
MNF president Zoramthanga chuan Aizawl Municipal Corporation (AMC) inthlana an party candidate turte chu January 18, Thawhṭanni zan khan Ignite Studio, Aizawlah a puang. Zoramthanga chuan, MNF candidate-te chu thlang tling turin mipui a ngen.
Zoramthanga chuan, AMC councillor atana an candidate-te chu mi chhuanawm tak tak an nih thu leh an tlin ngei a beisei thu a sawi a, "MNF hi Pathian leh kan ram tana ding a ni a, Pathian dah hmasain ram rawng kan báwl ang. Mipuite awpbet tur ni loin, Pathian ṭih chungin mipui rawngbawl turin rilru kan buatsaih tur a ni. He inthlanah hian MNF candidate-te thlang tling ngei turin mipuite ka ngen a ni," a ti.
MNF chu hun harsa tak karah Pathianin kum 60 a hruai tawh tih sawiin MNF President chuan, "Pathian leh kan ram tan, tia innghahna kan neih hi kan nun kaihruaitu atan kan hmang tlat a, chuta theihtawpa kan kalna chu kan tlin lohna leh fel lohna tam tak karah pawh Pathianin kan felnaah min ruatsak tlat a ni," a ti a; MNF chu 'Pathian leh kan ram tan' titu party a ni tih hre renga inthlan hmachhawn turin candidate-te leh MNF mite a chah.
Candidate puanna inkhawm hi MNF vice president Vanlalzawma'n a kaihruai a; senior vice president Tawnluia pawhin thu sawiin, "Kum 2018-a mipuiin MNF sorkar min siamtir leh aṭang khan AMC thuam ṭhat leh tihphuisui kawngah hmalak nghal a ni. AMC dan hmante a ṭul anga siamṭhat a ni a, thawktu pawh za chuang zet zawt la turin kan siam fel a, Covid hripui vangin kan la ti thei lo mai chauh a ni," a ti.