KHAWTHLIR

Mizoram sorkara NSS Cell chuan nimin khan Civil Hospital blood bank-ah thisen pek an huaihawt a, zirna-in hrang hranga NSS volunteer-te'n thisen unit 22 an pe. Thisen petute chu Zemabawk HSS aṭangin mi 10, Women Polytechnic aṭangin zirlai pariat leh Mizo HSS aṭangin mi pali an ni.  

Minister of state Lalruatkima chuan nimin khan Rangvamual Local Council Futsal Gound a hawng. Futsal ground hi SEDP sum aṭangin UDPA kaltlangin Rs. 9,80,000 sênga siam a ni a, a hawnnaah hian bialtu MLA Zothan­tluanga pawh a tel a ni.

Nimin khan Mamit District Hospital-ah Covid-19 laka invenna damdawi (vaccine) Covishield pek chhuah ṭan a ni a, damdawi-ina thawkte bakah, Mamit main centre leh a chhehvel sub-centre-a thawk mi 124 hnenah pek a ni. Mamit district-ah hian healthcare worker mi 782 hnenah vaccine pek tura ruahman a ni a, a thawh khatnaah hian mi 450 daih damdawi an dawng a ni.

Nimin Vanglaini chhuaka AMC inthlan lo awm tura ZPM candidate-te tarlanah, Ward XVI-a ZPM candidate tur R Lalawmpuii, Bethlehem Veng tih chu Bethlehem Vengthlang zawk a ni.

Minister of state Dr K Beichhua chuan nimin khan Siaha district-a a department enkawl - Excise & Narcotics leh Social Welfare pisa tur sak mek a tlawh a, Mizoram Youth Commission coaching centre tur a tlawh bawk. Minister chuan, hna thawktute chu ṭha taka thawk turin a chah a ni.

Nimin tlai dar 5 dinhmun angin, State Referral Hospital-ah Covid-19 vei mi 10 enkawl mek an ni a, an zingah kum 60 chung lam leh naupang kum 14 hnuai lam an awm lo. SRH-ZMC Bulletin tarlan danin, mi 10-te chu Isolation ward-ah enkawl an ni a, mi pahnih chu oxygen pek mek an ni.