Budget allocation sawiho

India budget siam tura inpuahchahna kal mekah January 18, Thawh­­ṭanni khan Union Finance minister Nirmala Sitha­raman hoin state leh union territory tin sorkar hotute'n video conference hmangin budget alloca­tion chungchang an sawiho a, chief minister Zoramthanga, Finance department enkawltu ni bawk pawh a tel.

CM Zoramthanga chuan, Union Finance Minis­ter hnenah hian Covid-19 léng vanga sum harsatna Mizoramin a tawh thu leh India hmar­chhak state-te chu tlawhpawh harsa zawk hmuna awm an nih avangin hmasawnna tur sum (development fund) hrang hrangah ngaih pawimawh ngai an nih thu a sawi.

Hripui léng avangin sorkar laipuia chhiah lut a tlem phah tih sawiin Zoramthanga chuan, "State tinte'n sorkar laipui aṭanga kan chan ve tur sum pawh a tlem phah avangin hmasawnna hna thawk tur chuan externally aided project-ah thui tak kan innghah a ngai," a ti. Chumi atan chuan EAP sum hmuhte state-in a lo do lêt vena tur (state share) chu 10%-ah tihhniam leh ni se a duh thu Finance Minister hnenah a thlen a ni.

CM chuan, 15th Finance Commission-in kum 2020-21 chhunga state-te hnena special grant cheng vbc. 6,764 pek ni se tia rawtna a siam tawh, Finance Ministry-in a lo hnâwl tawh chu ngaihtuah ṭhat leh ni se a duh thu a thlen bawk.

Meeting-ah hian Chief Minister Zoramthanga hi Finance secretary Vanlalchhuanga'n a ṭawiawm a ni.