Golf Course tlawhtu an ṭhahnem

Kum 2020 Krismas leh 2021 kum thar vuakvetah Thenzawl Golf Course tlawhtu an tam a; December 15-31, 2020 chhung khan mi 843 leh kuminah January 18 thleng khan mi 4,400 velin an tlawh tawh.

Vanglaini palai zawhna chhángin Then­zawl Golf Course enkawl­tu Tourism department hotute chuan, Thenzawl Golf Course chu Covid-19 kaihhnawiha inkaih­hruaina hrang hrangte zâwm chungin December 15, 2020 aṭangin mipui tlawh theihin hawn a nih thu an sawi. 

Tourism department hotute chuan, December 15-31, 2020 chhung khan Thenzawl Golf Course chu mi 843-in an tlawh a, chuta ṭang chuan Rs. 8,50,000 an hmu tih an sawi a; kumin (2021)-ah January 18 thleng khan mi 4,400 velin an tlawh tawh thu leh tlawhtu an pun zel an rin thu an sawi bawk. January thlaah hian Pathianni chhiar tel loin ni khatah mi 294 vel zelin an tlawh ang a ni.

Covid-19 laka inkaih­hruaina zuiin Golf Course tlawh turte chu luhtir ṭhin an nih thu sawiin Tourism department hotute chuan, "Ṭum khatah mi 35 zelin kan luhtir a, mi 35 aia tam an awm chuan páwnah an luh theih hun tur an lo nghâk ṭhin," an ti. Luh manah discount chi hrang hrang an siam thu sawiin, "Mi 5-10 tan 30%, 10-20 tan 40% leh mi 20 chung lam tan 60% discount kan ti a, kal an ṭhahnem thei hle a ni," an ti.

Tourism deptt. hotute chuan, Covid-19 avangin state páwn aṭang­in khualzin an rawn luh theih loh thu leh chumi avang chuan local tourism tihhma­sawn tumin ṭan an lâk thu Vanglaini an hrilh a, "Tualchhung mite hîp thei tur leh an tlawh duh tura cheibâwl kan tum mek a, sorkarah Mizoram Tourism Unlock ruahmanna kan siam a, a la kal mek a ni," an ti. Niche Tourism-ah nasa taka hmalak an tum thu leh Cabinet pawmpuinain Arrow Sport Rules leh River Rafting Rules thar an neih tawh thu an sawi bawk.