AMC inthlanah mipui tam zawkin Kan sorkar an ring - MPCC Treasurer

Mizoram Pradesh Congress Committee (MPCC) chuan nimin khan hmun hrang hrang­ah AMC huam chhunga intawhkhawm an buat­saih a; Lal Thanhawla Auditorium-a thu sawi­tu MPCC treasurer Zodin­tluanga Ralte, MLA chuan, "AMC inthlan awm turah Congress kan sorkar ngei hi Aizawl mipui tam zawk rin dan a ni," a ti.

Congress party Trea­surer chuan, MNF sorkar chu an inhmuh len viau lai leh ZPM-in an vanglai an hmang emaw an tih laiin, Mizoram mipui tam zawkin Congress ruhrel lenzia leh nghehzia an sawi tam ber niin a sawi a; "MNF-in AMC candidate an puang a, an President thusawi khan mipui rilru a tithlep. Ṭhalaite tan pawh phûrna tur a awm thlâwt lo," tiin, Congress an thawh leh dawn chian thu a sawi.

Sum enkawl thiam loah MNF sorkar puhin Zodin­tluanga chuan, "Sum leh páiah hian an hlawhchham dêr a ni. Sum enkawltu sorkar hnathawkte pawh an mangang. MNF sorkar laiin ruihhlo vanga thih tam ber kum a ni a, nikum 2020 kha kum nga chhunga Mizorama tualthi tam ber kum niin, law & order-ah mipui thlamuanna an tling zo thlâwt lo a ni," a ti.

Zodintluanga chuan, MNF-in an sorkar hma­sakin uchuak takin Tuirial HEP-ah zangna­dawmna dik lo an la tih sawiin, "Tunah an sorkar leh a, NH-306 four lane zauh­na tur atan dik lo taka zángnadawmna lâk tumin buaina a awm leh mek. MNF sorkarah kawng eng­kimah thil thleng ṭha lo kan hmu fo tawh a ni," a ti a; Mizo mipuiin thil ṭha lo an hmuh fo lohna turin MNF sorkar tihtawp a ngaih thu a sawi bawk.