Hâlpuah/hàlmawi vangin mi 22 man Rs.1,00,000 hù hàlpuah/hàlmawi man
Kum 2020 Krismas leh kum thar 2021 vuakvêtah hàlpuah leh hàlmawi kawl leh hâl vangin mi 22 man niin, an lakah police station-ah thubuai ziah luh a ni. Hàlpuah leh hàlmawi Rs. 1,00,000 hû police-te'n an man bawk.
Nimin khan Secretariat conference hall-ah Home minister Lalchamliana hoin nikuma Krismas leh kum thar 2021 vuakvêta sorkarin hàlpuah, hàlmawi leh meithallàwn khapna thupek a chhuah bawhzui dan thlir lêt a ni a; police-te hmalakna leh thupek bawhchhia man chungchangte sawiho a ni.
Ṭhutkhawma tarlan danin, kum 2020 Krismas leh kum thar 2021 vuakvêta hàlpuah leh hàlmawi kaihhnawiha police station hrang hranga man mi 22 zinga 17 chu hàlpuah hâl vanga man an ni a; mi panga chu hàlpuah mansak thubuai a ni thung.
Police-te'n hàlpuah leh hàlmawi Rs. 1,00,000 hù an man a; chu'nga inhnamhnawih mi 28 chu thubuai siamsak niin, Court-ah chargesheet thehluh a ni tawh.
Hetih lai hian, kum 2019 Krismas leh 2020 kum thar vuakvêta hàlpuah leh hàlmawi kaihhnawiha police-in thubuai pakua ziah luhah mi paruk chu hrem an ni tawh tih tarlan a ni.
Fire & Emergency Services chhinchhiah danin, hunpui hnuhnung berah hàlpuah leh hàlmawi hàl vanga kângmei chhuak sawi tham a awm lo a; police hotute pawhin kum dang aiin boruak a rálmuan thu leh Mizoram pumah buaina lian tham a awm loh thu an sawi.
Home minister Lalchamliana chuan, hàlpuah hàl lohna veng leh a hâlte mipui hriata an hming hmerha tarlang veng ṭhenkhat hnenah lawmman pek a rawt a, "Hemi atana hman turin keima Discretionary Fund aṭangin Rs. 25,000 ka thawh dawn a ni," a ti.
Meeting chuan, Krismas laiin mipuiin hàlpuah leh hàlmawi an hâl lo chu lawmawm an ti a; chutih rualin, kum hlui thlah zana veng ṭhenkhatin an hâl miah loh laia veng ṭhenkhata hâl an awm chu pawi an tih thu an sawi. Hunpui laiin hàlpuah leh hàlmawi hâl an awm tawh loh nan kum tìr aṭangin sorkar leh Central YMA ṭangkawpin hmalak ni se, tiin an rél.
Tun hnuah chuan hàlpuah leh hàlmawi khapna thupekte bawhzui turin Aizawl SP hnuaiah cell din an rél a; mipui zirtirna lamah Mizoram Kohhran Hruaitute Committee leh Synod Social Front ngen ni se, an ti. YMA branch tinah inzirtirna lam hawi awmze nei zawka neih leh hàlpuah leh hàlmawi do kawnga thawk ṭha veng thlan chhuahte an rél bawk.
Ṭhutkhawmah hian Home secretary Lalbiaksangi, additional DGP LH Shanliana, Aizawl DC leh SP, Fire & Emergency Services hotute leh Central YMA hruaitute an tel a ni.