Covid-19 vanga eizawnna chánte tana Hmalakna thawh hnihna tlangzarh a ni

Mizoram Youth Commission (MYC) chuan, state páwna hna thawk, Covid-19 vanga an eizawnna chánte'n eizawnna an neih leh theihna atana hmalakna thawh hnihna tlangzarhna hun nimin khan Aijal Club-ah an buatsaih a; Labour, Employment, Skills Development & Entrepreneurship (LESDE) minister Lalchhandama Ralte-in a hmanpui.

Lalchhandama Ralte chuan, MYC chu MNF sorkarin kum 2006-a bul a ṭan nia sawiin, "Congress sorkarah ṭhahnemngai takin kawng tam takah hma an la a. Pathian leh mipui zara kan sorkar leh hnuah kan hotupain chairman atan mithiam leh chak tak mai a ruat a, Covid-19 avanga a kum têl kan buai chung pawhin ṭhalaite tana an ṭangkaizia leh hnathawh ropui tak kan hmu zel a ni," a ti.

Covid-19 avangin state páwna eizawng mi sing têl an rawn haw tih sawiin Lalchhandama chuan, "Covid-19 hian khawvel, India, Mizoram economy a nghawng. Chuti chungin harsatna tâwkte tan MYC chuan pa chan changin, chhawmdawl dan tur a ngaihtuah a ni," a ti a; MYC kaltlanga sorkar duhsakna chang turte chu taima taka hlawhtling ngei tum turin a chah. 

LESDE Minister chuan, Pathian­in Mizote theihna (talent) ṭha tak a pek thu sawiin, "Kan talent ni lo pawh kan zir chuan kan thiam mai zel. Covid-19 boruakte a ziaawm zel turah ngai ila, kan din khawchhuah theihna turin khawi hmunah pawh kan kalin, hnam rinawm leh thil tih tawh belhchian dâwl tia sawi kan nih theihna atan Mizo ṭhalaite'n theihtawp chhuah se ka duh," a ti.

MYC chairman Dr Vanlalṭanpuia, MLA chuan, Covid-19 avanga state páwna hna thawk, an eizawnna chánte thlavâng hauh turin hma an la tih sawiin, "Eizawnna chân vanga state dang aṭanga rawn haw zawng zawngte an qualification, state páwna an hnathawh leh thil dangte kan la khawm vek a ni," a ti a; anni ho tan project siamin NEC-ah an thehluh thu a sawi. 

Dr Vanlalṭanpuia chuan, NEC aṭanga an sum hmuh cheng nuai 300 hmangin a thawh khatnaah department dang leh MZU-te nen training an buatsaih thu a sawi a, "A thawh hnihna atan hian cheng vbc. 3 tling lo deuh hmuh leh a ni a, DC tinte kaltlangin training buatsaih a ni dawn," a ti.

Inkhawma tarlan danin, tun ṭumah hian vawk vulh, cake siam, ei leh in tur sawngbâwl leh cement mistiri zirna buatsaih a ni dawn a; mi 1,107 tan training theih tura ruahman a ni. Training-a telte chu TA/DA pek an nih bakah, an training zawhah an kal zelna atana an mamawh turte pek a ni ang.

Cement mistiri training hi district tinah buatsaih a ni dawn a; ei tur siam dan chu Aizawl, Lunglei, Siaha, Champhai, Serchhip leh Hnahthialahte buatsaih a ni ang. Vawk vulh chu Mamit, Kolasib, Saitual, Khawzawl, Lawngtlai leh Serchhipahte buatsaih a ni dawn a; Aizawl, Lawngtlai, Siaha, Kolasib leh Champhai district-ahte cake siam zirna buatsaih a ni ang.