Pass dik lo nena periodic patta diltu Hnâwl turin MPCC-in Governor ngen

Kolasib district-a NH-306 zauhna turah zangnadawmna lâk tum vanga Kolasib Settlement Office-in periodic patta dilna eng emaw zat an dawn chungchangah Congress party chuan nimin khan Governor PS Sreedharan Pillai hnenah lehkha an thehlut a; VC Pass dik tak neite dinhmun humhim a, pass dik lo neite dilna hnâwl turin an ngen.

Governor hnena ngenna hi Congress party aiawhin general secretary Joseph Lalhimpuia hmingin thehluh a ni a; Congress party thupuangtu Dr Lallianchhunga'n Governor Secretary hnenah a thehlut a ni.

MPCC chuan thuchhuah siamin, tun hnaiah Kolasib Settlement Office-in mi 165 hnen aṭangin periodic patta dilna an dawng tih an tarlang a, "Periodic patta dilna zingah hian Bilkhawthlir khaw huam chhunga diltu mi 16 chuan VC seal lem leh VCP signature an hmang ngeia rinhlelh a nih avangin January 16 khan Bilkhawthlir Joint VC chuan Bilkhawthlir Police Outpost-ah FIR an thehlut hial a ni," an ti.

Ram lâk (land acquire) aṭanga zangna­dawmna lâk theih a nihin mi dik tam tak karah mi dik lote'n remchang an chuh ve ṭhin tih sawiin MPCC chuan, "NH-306 zauh turah pawh mi dik tam tak karah mi dik lote’n inrawlh an tum ngei ang tih kan ring," an ti. VC Pass dik tak neitute harsatna hrethiam a, an ram hlutna ang sum an dawn theihna tura hma la tur leh dik lo taka periodic patta neih tumte hnâwl an nih theih nan hma la turin Governor an ngen tih an sawi.

MPCC tarlan danin, NH-306 hi Silchar aṭangin Tuipang thleng a ni a, four lane-a siam turin ruahman mek niin, National Highway Infrastructure Corporation Limited (NHIDCL) thawh tur a ni. Kolasib district-a periodic patta dilna lutte chu NH-306 zauhna tur kawngpui huam chin aṭangin a ni.