Kum tharah chuan sum dinhmunah ngai kan awh leh tawh ang: Chief Minister
Chief minister Zoramthanga chuan, Mizoram sum dinhmun harsatnain ziaawm lam a pan zel a rin thu sawiin, "Covid-19 damdawi a awm tawh a, chuvangin, kuminah chuan ngai kan la awh pha lo deuh ang a, kum leh lamah chuan ngai kan awh thei tawh ang," a ti.
CM hian he thu hi nimin zinga nimin zínga Kulikawn, Tlangnuam leh Hlimen khelmualte a tlawh ṭumin a sawi a; khawtlang hruaitute leh tlawmngai pawlte nen hmalakna tur an en.
CM Zoramthanga hian Hlimena Smart City Project hnuaia cheng nuai 600 hmanga khelmual siam tur te, Kulikawn futsal ground leh basketball court tur siam mek leh, Tlangnuam field-te a tlawh a; Sports minister Robert Romawia Royte, Aizawl South-III bialtu MLA Prof. F Lalnunmawia, Sports department leh LAD hotute'n an ṭawiawm a ni.
Chief Minister chuan, "Hri léng karah sorkarin a thawh theih chin chinte thawkin hma la mah se, ruahmanna tam tak chu thawh mai theih a ni lo. Hri danna a awm tâkah chuan boruak pawhin ziaawm lam a pan zel beisei chungin, chak zawka hmasawn hna thawh chhoh zel a ni dawn," a ti a; veng neitute'n ṭhahnemngai taka hma an lâk tawhnaah lawmthu a sawi.
Sports minister Robert Romawia Royte pawhin thu sawiin, infiamna kawnga hmasawnna ruhrel ṭha din belh zel a nih thu leh, Aizawl chhim lam tan chauh ni lo, state pum tana ṭangkai tur infiamna hmunhma ṭha siam sorkarin a ngaih pawimawh thu a sawi a ni.