Siaha district-ah sorkar hmalakna thlirho
Siaha District Development Coordination and Monitoring Committee chu nimin khan Siaha DRDA conference hall-ah an chairman C Lalrosanga, Lok Sabha MP hoin an ṭhukhawm. Siaha district-a sorkar laipui sum hmanga nikuma hna thawh te, CSS hmanga department-te hmalakna, hmachhawp leh harsatnate an thlirho a ni.
MP C Lalrosanga chuan, DISHA meeting chu tih dik loh zawn chhuah (fault finding) a nih loh thu sawiin, "CCS line department-te'n sorkar laipui scheme-te ṭha taka an kalpui thei nan te, harsatna an neihte leh an hmasawnna chinte inhriatpui tawn a, thawhhona ṭha an neih theih nan te, scheme leh plan ṭha leh felfai tak duan a nih theih nan meeting hi neih a ni," a ti. Department-te chu hunbi ruata an hnathawhte zo hman tura chahin, mipui tan theihtawp chhuah turin a fuih bawk.
Ṭhutkhawmah hian Siaha bialtu MLA Dr K Beichhua, minister of state leh Palak bialtu MLA KT Rokhaw te pawh an tel a ni.
Ṭhutkhawma an tarlante
• Siaha district-ah hian MGNREGA hnuaiah kum 2019-20 chhungin job card nei mi 16,353 awmin, November 2020 thleng khan ni 85 inhlawhna siam a ni a; December 2020-ah ni nga, kumin January-ah atan ni ruk leh February-ah ni li, a vaiin ni 100 inhlawhna siam tum a ni.
• PMAY-G (Rural Housing Scheme) hnuaiah kum 2019-20 atan beneficiary 895 thlan a ni a, a hmuna enfiahna zawh tawh niin, registration kalpui mek a ni.
• JMM hmangin PHE department-in district chhunga khaw 17-a chhungkaw 2,475 hnenah tui connection FHTC an pe tawh a; kum 2020-21 chhungin khaw 11-a chhungkaw 2,546 hnenah pek leh an tum.
• PMGSY fund aṭangin PWD hnuaiah April 2019 - December 2020 chhungin kawng 32 sial a ni a, chu'ng zinga 13 chu siam zawh a ni tawh.
• PMAY (Housing for All - Urban) hnuaiah kum 2019-20 khan dilna 1,418 a lut a, 174 hnâwlin, dilna 1,244 pawm a ni.
• NHM hnuaiah April-November 2020 chhungin nau piang 845 an awm a, nausén 24 thiin, infant mortality rate (IMR) chu 28 (nausen 1,000-ah 28 an thi) a ni. Nau chunga thi nu pahnih an awm a, maternal mortality rate (MMR) chu 236 (nu 1,00,000-ah nu 236 an thi) a ni.
• April-November 2020 chhungin HIV hrik pai mi 22 hmuh chhuah belh niin, mipa 16 leh hmeichhia paruk an ni a; sikserh vei mi 365 hmuh chhuah thar a ni bawk.
• NSAP hnuaiah IGNOAS beneficiary 5,286 leh kum 80 chung lam mi 325 an awm.
• ICDS project hnuaiah anganwadi centre 126 a awm.
• PMMVY scheme hnuaiah hmeichhia kum 19 chung lamte'n an fa pakhatna an neihin ṭanpuina Rs. 5,000 an dawng (instalment-in) a; Rs. 5,000 dawngtu mi 1,903 awmin, cheng nuai 95.15 pek chhuah tawh a ni.