END Minister-in ruihhlo a hâl ral

Excise & Narcotics minister Dr Beichhua chuan January 18, Thawhṭanni khan Mara Thyutlia Py (MTP), Siaha branch man khawmsa ruihhlo chi hrang hrang a hâl ral.

Ruihhlo hâlna inkhawmah Dr K Beichhua chuan, ruihhlo do kawnga MTP hmalakna chu chhuanawm a tih thu sawiin, "MTP leh Excise department-te'n thawhhona ṭha tak kan nei ṭhin a, NGO-te leh Excise department thawhhona hi nunna chhan chhuahna tur a ni," a ti a; ruihhlo do kawnga thawkho zel turin a sáwm.

Ram siam hna chu mi tam takin an thawk lo tih sawiin K Beichhua chuan, "Mi pahnih khat ṭhahnemngaite avangin ram hmél a danglam ṭhin a, hei vang hian Excise force-te pawh lian lo mah ila, ruihhlo do kawngah ṭhahnemngai taka thawk tur kan ni," a ti.

Siaha MTP-te'n ruihhlo an mante chu heroin leh pill chi hrang hrang, tualchhunga hralhna angin Rs. 80,000 hû leh sapzu ûm puitling 236 leh rakzu litre 12 (tualchhung rate-in Rs. 45,00,000 hû) a ni.

February 2020 thla aṭangin Siaha khawpui leh chhehvelah zu siamna paruk, zu siamna bél panga, dekchi pahnih leh tui chawina ṭín (Brite) panga an man tawh a ni.