Aizawlah CAB duh lohna lantir

North East Students' Organisation (NESO) bultumin nimin khan India hmarchhak state hrang hrang khawpuiah Citizenship Amendment Bill (CAB) duh lohna lantir a ni a, Aizawlah pawh MZP huaihawtin Vanapa Hall kawtah sit-in protest huaihawt a ni. MZP president B Vanlaltána chuan, CAB chungchanga Mizoram sorkar hmalakna an thlir mek thu a sawi.

Vanapa Hall kawta sit-in protest-ah hian B Vanlaltana chuan, CAB vanga Joint NGO-te'n Republic Day boycott an tum ṭumin sorkar hotute chuan 'Sorkar tìr kan ni a, duhthu hmun, duh loh thu hmun kan ni. Inkhel ho tur kan ni a, ballboot min buntir phawt ula, hma kan lo la ang' an tih thu a sawi a, "Ballboot kan buntirte hian hma an la em tih hi kan zawhna a ni. CAB pass a nih lohna atan Zoram mipui pawh ṭawngṭai turin kan sawm a ni," a ti.

MZP President chuan, CAB chu Hindu induhsakna, Hindu lalram siam tumna a nih thu a sawiin, "Hmarchhak tan a him lo em em a, Mizoram tan a him lo leh zual. Vawi tam tak duh lohna kan lantir hnuah BJP-in CAB pass luih an la tum ṭâlh hi kan hrethiam lo. Bangladesh nen ramri km. 318 kan nei a, BSF an duty reng chungin Chakma-te an rawn pém pung reng a ni," a ti a; CAB chu a tàwp thlenga an dodal tur thu a sawi.

Mizo ṭhalaite'n Indian union hnuaia awm an châk em em lo tih sorkar laipuiin hria se a duh thu sawiin B Vanlaltána chuan, "India union-ah hian kan duh vang rênga awm kan ni lo, British-in min awp loh hnua awm ve mai kan ni. Sorkar laipui hian India khua leh tuia min chhiar tak tak lo a nih chuan kan tih tur kan tih ve hun a la thleng ang," a ti.

NESO finance secretary Ricky Lalbiakmawia chuan, kum 2014 inthlan dawnah BJP chuan Hindu duhsak bik leh ram páwna Hindu a tam thei ang ber seng luh an tlangaupui tih sawiin, "A tlin veleh BJP-te hian an thil tum tihhlawhtlin tumin CAB zir chiangtu tur committee an din a, anni hian Mizoram an tlawh lo. Central sorkar hian khua leh tuiah min ngaih lohzia a lang. Keini ai chuan Hindu an ngai pawimawh zawk a ni," a ti a; CAB chu sakhaw tih bik neia siam a nih vangin India Constitution kalh a nih thu a sawi.

Ricky Lalbiakmawia chuan, CAB pass a nih chuan BJP nena an inzawmna NEDA aṭanga an inhnuhdawh tur thu chief minister Zoramthanga'n a lo puan tawh thu sawiin, "Mizo mipuite bakah hmarchhak mipuite CM thusawiah kan lawm hle. Tuna pass a tum leh hi an hria em? Mahni party hamṭhatna ringawt ngaihtuah loin, an dinna ngaiah an ding dawn em tih kan thlir ṭhup a ni. CAB sawi nêp tumte an awm a, chu'ng mite chu kan ram leh hnam aiin mahni party hamṭhatna ngaihtuahtute an ni," a ti.

MZP hruaitute sawi danin, BJP kaihhruai NDA sorkar liam taah CAB pass tum ni mah se, pass theih a ni lo a, NDA sorkar thar chuan nimin aṭanga Parliament session neih ṭanah CAB chu pharh leh an tum a ni.