Aizawlah sipai lâk rûnpui nei mek a ni
Mizorama sipai lâk rûnpui, Indian Army Rally 2019 chu nimin zing khan Rajiv Gandhi Stadium, Aizawlah ṭan a ni a, a ṭanna hun hi Mizoram Youth Commission (MYC) chairman Dr Vanlalṭanpuia'n hmanpuiin, sipaia ṭan tuma intlar zawng zawngte duhsakna a hlân.
Dr Vanlalṭanpuia chuan, sipaia hna hrang hrang thawk tur lakna chu Mizoram ṭhalaite tan hna nghet leh ṭha a nih avangin MYC-in a ngai pawimawh tih a sawi a, "Mizoram ṭhalaite an tlin tam theih nan MYC chuan kum 2019-ah hian Assam Rifles nen thawkhoin Aizawl, Lunglei, Saihaah leh Vairengteah CIJWS nen thawk dunin, Indian Army Pre-Recruitment Training a thlawnin kan buatsaih a, ṭhalai 600 chuangin an zawm a, Mizoram tana post ruak zat hnawh khah vek a nih theih nan MYC chuan theihtawp kan chhuah a ni," a ti.
Aizawla sipai lâk rûnpui atan hian Mizo ṭhalai 2,753-in online registration an ti a, nimin khan Aizawl district-a mite tan physical test tih niin, vawiinah Aizawl district pawn lama mite tan physical test tih a ni ang. Physical test-a tlingte chu November 22-ah medical test neihpui an ni ang a, medical test-a tlingte chuan January 19, 2020-ah written test an hmachhawn leh dawn a ni.