Central service/all India services-ah Mizo an tlin theih nan Synod-in sum dah a rêl

Mizoram Presbyterian Kohhran chu December 3-8, 2019 chhunga Synod Inkhawmpui hmang turin an inbuatsaih mek a, tunlai hian committee hrang hrang an ṭhu ṭhin. Synod Executive Committee (SEC) pawh November 12-14 chhung khan an ṭhu a, central service leh all India services-ah Mizo an tlin tam theih nan hma latu tur committee ruangám an din a, budget-a sum dah an rêl.

SEC ṭhutkhawm vawi 281-na, JM Lloyd Hall, Synod Office-a neihah hian agenda hrang hrang 101 a awm a, chu'ng zingah chuan Presbytery aṭanga thu lut agenda 20 a tel. SEC hian Mizo ṭhalaite all India service leh central service-a an luh tam theih nana hmalak dan tur an ngaihtuah a; hma latu tur bik committee ruangám an siam bakah, Synod budget-ah Rs. 5,00,000 dah ve an rêl a ni.

SEC meeting hian Pathian thu zirna ni lo college (secular college) Mizoram Christian College dinna turin a hmun tur ram cheng nuai 150 man lei belh an rél a; Zoram Medical College, Falkâwnah chaplain quarters leh khualbûk sak 

ṭha an ti bawk. SEC thurel zinga tam zawk chu Synod Inkhawmpuia la pharh leh tur a ni.

Synod-in Mizoram Christian College din a tum hi a hmun tur chu Tanhril, Aizawlah a ni a, kum 2020-2021 academic session aṭanga ṭan tumin, Mizoram University-ah phalna a dil tawh. MZU pawhin Synod dilna chu endik turin Prof. Jyoti Kumar kaihhruai committee a din a; member dangte chu Prof. Laltluangliana Khiangte, Prof. Lalrintluanga, Higher & Technical Education department Director (a aiawh emaw) leh, College Development Council director Prof. Lalbiakdiki Hnamte te an ni.

MZU-in endiktu committee tih tura a ruahmante chu - Mizoram Christian College-a course zir tur an ruahman te, college tur hmunhma leh college-in a ken tel thil chi hrang hrang enfiahte a tel. Thu dawn danin, Mizoram Synod-in Mizoram Christian College a din tura a bul ṭanna aṭanga course zir theih tura a thlante chu - English, Mizo, Philosophy, Sociology, Public Administration, Political Science, Mass Communication, Business Administration leh Commerce-te a ni.

November 12-14 chhunga SEC ṭhutkhawma an tarlan danin, kuminah August thla thlenga mission field hrang hranga ringthar an neih zat chu 7,783 a ni. Mizoram Synod hian mission field 18 a nei a, chu'ngte chu Mizoram chhungah pathum leh Mizoram páwnah 15 a ni.