KHAWTHLIR

Horticulture Development Board chu an vice chairman Prof. F Lalnunmawia, MLA hoin nimin khan a pisaah an ṭhukhawm. SEDP hnuaia horticulture lama ei zawngtute tana hmalak dan tur kawng hrang hrang - quality improvement-a hmalak dan tur, post harvest-management lama hmalak dan tur, horticulture hmasawnna tura CSS awmsa bakah, ramin a mamawh dan azira project siam tawh leh siam mekte chak zawka kalpui dan turte an sawiho. Sawiho hrang hrang atan hian project siam an rel a ni.

Beti Bachao Beti Padhao (BBBP) hnuaia Serchhip district-a Task Force Committee chu nimin khan an chairman Sangchhin Chinzah, district bawrhsap hoin DC Meeting Hall-ah an ṭhukhawm a, BBBP hmalakna kal mek chhunzawm zel dan tur an ngaihtuah. Meeting-ah hian, financial year kal meka BBBP hnuaia hmalakna tur chi hrang hrang ruahmante thlir­in, huam zau zawka awareness neih dan tur an sawiho a ni. BBBP hi hmeichhiate chawikanna leh hmeichhe naupangte humhima enkawl puitling ngei tura inzirtirna a ni.

November 9, 2019 zana Champhai District Court-a PI room rawktua puh Lalpekhlua (23) s/o Hramliana (L) chu tun hnai khan police-in an man. Rûkru hian steel almirah kar chhiain, document pawimawh eng emaw zat chu court dáiah a hâl a ni. Lalpek­hlua chuan, naupang khuaikhem thubuai a neih laka a him theihna a nih beiseiin document-te chu a hâl niin police hmaah a sawi.

Auxiliary Nursing Midwifery (ANM) School, Lawngtlaia Anti Ragging Committee chu nimin khan an ṭhukhawm. Meeting-ah hian ANM-a zirlai hruaitute chuan an sikulah an zirlaipui rilru leh taksa lama tihduhdah tuar an awm ngai loh thu an sawi a, zirlai nu leh pate pawhin an fate aṭangin hetiang lam hawi an hriat loh thu sawiin, Lawngtlaia thuthar thehdarhtute pawhin ragging a awm an hriat loh thu an sawi bawk. Meeting chuan zirlaiten an zirlaipuite lakah tihduhdahna an tawrh leh tawrh loh chu nguntaka enzui reng nise, an ti.