AMPFA-in arsa an lambun thu an puang Permit pek loh laia ar lak luh dan kawngah Sorkar tha kan tichak zel dawn - AMPFA

All Mizoram Poultry Farmer Association (AMPFA) hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkarin ar lak luh phalna (permit) a pek loh laia ar tawlh luh ṭhinte dan kawngah sorkar thâ tihchak zel an tum thu an puang. November 15, 2019-a Lungdai leh Sihphir inkara ar puah sa lambuntute chu AMPFA mi leh sate an nih thu an sawi bawk.

AMPFA general secretary Zomuanpuia chuan, AMPFA-ah ar vulha eizawng chhung­kaw 1,220 an tel tih sawiin, "Kan pawl chuan Mizoram hi state dang aṭanga arsa lak luh ngai loa arsa thianghlima intodelhtir kan tum ber a ni," a ti.

Zomuanpuia chuan, Assam aṭangin Vairengte Arsa Zuar Association (VAZA)-in sorkarin arsa lak luh phalna a pek loh lai pawhin an la lut reng nia sawiin, "November 6-30 chhung hian Trade & Commerce department-in ram páwn aṭanga arsa lâk luh a phal lo," a ti a; chuti chung chuan VAZA-te chuan Assam lama hnam dangte nen ṭang tlangin Mizoram páwna ar an tawlh lut reng niin a sawi.

AMPFA hruaitute chuan, November 15, 2019 (Zirtawpni)-a Lungdai leh Sihphir inkara ar puah sa, VAZA ten an thawn chhuah chu AMPFA mi leh sate'n an lo khawihsak thu sawiin, dan phal loha phurh luh a nih vanga khawih an nih thu an sawi a, "Mizo leh Mizo buaina ni loin, ár hmanga sumdawng Assam vai leh Mizorama ar vulhtute inkar buaina a ni," an ti.

Zawhna chhangin AMPFA hruaitute chuan, VAZA-te'n Aizawl leh khaw danga dah tur ar puah sa Rs. 6,72,000 man Lungdai leh Sihphir chhaka an lo lambun a, an paihsak avangin an mi leh sa eng emaw zat chu police-in an man thu an sawi a, "An man thu kan hriatin a huhoin police station-ah kan kal a, minister leh MLA-te'n min puih avangin tunah chuan police-in an chhuah leh vek tawh a ni," an ti a; sorkar hotute nen an thawhho thu an sawi.

AMPFA hruaitute chuan, Vairengtea ar zuartute chu vai hoin hmanruaah an hmang niin an sawi a; phai aṭanga Mizorama ar lak luh nasat a nih apiangin Mizorama árte'n hriselna kawngah harsatna an tâwk ṭhin niin an sawi bawk.

AMPFA adviser F Lalhmangaiha chuan, Mizoram sorkar nen an thawhhona a ṭhat thu sawiin, "Mahni ram chhung ngeia ar vulh min duhsak theitu, hnama chiang sorkar kan nei hi kan lawm hle," a ti a; MNF sorkar hnuaiah Mizoram ar vulhtute'n hmasawnna an neih an inbeisei thu a sawi a ni.