Vairengte-in November 22, 2019 thleng Sorkar hmalakna an ngaichâng dawn

Vairengte Arsa Zuar Association (VAZA) member-te'n Aizawl leh khawpui danga dah tur arsa (puah sa) cheng nuai 6 chuang man an thawn, All Mizoram Poultry Farmer Association (AMPFA) mi leh sate'n Lungdai chhaka an lo paihsak chung­changah Vairengte Joint V/C leh All NGO chuan hmalak zui an tum a; November 22, 2019 thleng sorkar hmalakna an ngaichâng dawn.

Vairengte aṭanga thu dawn danin, AMPFA-te chêt dan chungchang hi Vairengtea V/C-te leh NGO-te chuan November 17, Inrinni khan an ngaihtuah a; a ṭul anga hmalak zui zel relin, arsa man hmuh lêt a nih theih nan leh a ṭul angin na zawka hmalakho zel ni se, an ti.

Vairengte Joint V/C leh All NGO-te Pathian­nia ṭhukhawm chuan resolution siamin, ar puah sa mana paihsaktute chu dan anga an phû tâwk hremna pe ngei turin sorkar an phût a; bungrua leh sum an hloh zat ang zangnadawmna pe turin sorkar an phût bakah, sorkarin sumdawnna chungchangah inkhuahkhirna leh dan mumal leh ṭha siam se an duh thu an tarlang bawk.

An resolution chung­changah Mizoram sorkar chu a rang lama hma la turin an phut a; November 22, 2019 ral hma ngeia sorkar aṭanga thu lawmawm an hmuh loh chuan na zawka hmalak an tum. An hmalak lehna turah Mizoram mipui­te hriatthiamna an ngen lâwk a ni.

Arsa inpaihsak chung­changah hian VAZA hruai­tute chu November 16 khan Aizawlah an kal a, Aizawla Vairengte Welfare Committee hruai­tute leh bialtu MLA Lalrinsanga Ralte ten lo buaipuiin, FIR pawh an thehlut nawn leh a ni.

VAZA hruaitute sawi danin, November 16, Inrinni tlai lam khan AMPFA hruaitu mi 13 chu police-te'n thu zawhfiah turin Bawngkawn Police Station-ah an hruai a; Inrinni zan vek khan an chhuah leh nghal. Police-in an chhuah leh chung­changah hian AMPFA zinga pakhat chuan Facebook-ah, Chief Minister-in a chhuahtir leh thu a ziak niin an sawi.

Hetih lai hian, Bawngkawn PS officer in-charge Vanlalduata chuan zawhna chhangin, AMPFA mi leh sate chhuah tura nawr­na chung lam aṭang­in amah chuan a hmuh loh thu leh, AMPFA hruaitute chu an statement an lak hnuah danin a phût angin an chhuah leh mai niin a sawi thung.