Sipaiah Mizo la tam turin sipai hotute ngen

National Students Union of India (NSUI) Mizoram hruaitute chuan nimin khan Rajiv Gandhi Stadium, Aizawla sipai lâk rûnpui neih mek an tlawh a, sipai hotute nen inkâwmin, sipaia Mizo quota 300 awm chu hnawh khat a, Mizo ṭhalai a tam thei ang ber sipaia la turin an ngen.

NSUI Mizoram chuan sipai hotute hnenah, ṭum danga sipai lakah Mizo quota hnawhkhat lo a, hmun dang aṭanga hnawhkhah a awm leh awm loh an zawt a; sipai hotute chuan, chutiang a awm loh thu leh Mizo quota chu Mizo ṭhalaiin an hnawhkhah ngei theih nan an buaipui thu an sawi tih NSUI thuchhuah chuan a tarlang.

Congress party-in sorkarna a chan laiin Mizoram Youth Commission (MYC)-in kum 2018 kha 'Sipai lâk rûnpui kum' atan a puang tih sawiin, "Physical test leh written exam inbuatsaihna atan MYC-in mithiam ruaiin coaching class-te a kalpui ṭhin a, sum tam tak sêngin district tinah pre-recruitment rally a buatsaih ṭhin. Mizo ṭhalai tam tak mahni inring tâwk takin army recruitment-ah an inlan theih phah a, ṭhalai eng emaw zatin an tlin phah a ni," an ti.

Tuna sipai lak mekah erawh chuan MYC-in hmalakna a nei lo nia sawiin NSUI Mizoram chuan pawi an tih thu an sawi a, "Hetianga MYC-in kut an kuangkuah tlat laia Mizo ṭhalaite hmakhua ngaia Youth Vikash Society-te'n pre-recruitment rally an buatsaih hi lawmawm kan ti tak zet a ni," an ti a; Youth Vikash Society-te'n pre-recruitment rally khârnaa khuallian, Home Minister pawhin ngaihtuahna thar a sên an beisei thu an sawi.