Bru chhungkua 221 hruai kîr tawh

Tripura-a Bru Refugee camp-a Mizoram khua leh tui Bru-te Mizorama hruai kîr thawh 9-na kal mekah November 17, 2019 thleng khan Bru chhungkaw 221-te Mizoramah an rawn let tawh a, an awmna tur khuaah hruai nghal zel an ni.

Thu dawn danin, Bru lâk lêt thawh kuana hi October 3, 2019-ah ṭan a ni a, Pathianni thleng khan Tripura aṭangin Bru chhungkua 221-te chu Mizoramah an lêt tawh a, an vaiin mi 892 an ni. Bru hruai kîr tawhte chu Mamit district-ah chhungkua 134 (mi 553), Kolasib district-ah chhungkua 19 (mi 77) leh Lunglei district-ah chhungkua 68 (mi 262) an ni a; Bru lak let hna hi November 30, 2019 thleng thawh a ni ang.

Tarlan tawh angin, Bru camp-a pawl pathumte chuan Bru lak let hna tihtawp leh a thlawna buhfai pek leh phût vangin October thla tàwp leh November thla tìr khan Kanchanpur bulah kawngpui an lo dang a; Tripura sorkar nen an inbiak hnuah an titawp. Tripura sorkar chuan November thla chhung chu Bru-te hnenah hian a thlawnin ration (buhfai) a pe dawn a, a pe mek a ni.

November thla tìr lam aṭangin Mizorama haw tur Bru camp ṭanga lak lêt tur an awm tawh mang lo a, mahni thua Mizorama kîr tura Kanhmun khua pan leh Mizoram sorkarin facilitation centre a siama inhriattir pawh an awm tawh mang lo.

Sorkar laipuia Ministry of Home Affairs ruahman dan chuan, Bru lâk lêt thawh 9-na hi November 30, 2019 thleng neih tur a ni a, chumi chhung chuan Mizoram mi Bru-te chu lak let vek tum a ni. Mahse, a tak taka Mizorama haw duh erawh an tam lo a; Bru tamna ber district, Mamit district-ah chuan Bru chhungkaw 3,368 hruai kîr tura chhinchhiah a nih laiin, tun thlengin chhungkaw 135 chauh hruai kîr an ni.