Mizoramah Assam zu a lut ṭan Zu man a lêt chuangin a to tawh
Mizoram sorkarin December 21, 2018 aṭanga dry day a puan hnuah Mizoramah sap zu lei tur a váng a, rakzu erawh lei tur a awm reng thung. Assam-a hralh tura siam sap zu Mizoramah lei tur a awm tawh a, Vairengte thlang, Lailapur-a wine shop-te pawh an inchhêk muk ṭan.
Vanglaini palaiin zu in ṭhinte a zawh chiannaa a lan danin, Aizawl leh a chhehvelah chuan sap zu wine shop hawn a nih laia zu ûm khat Rs. 540 man chu tunah chuan Rs. 2,000-2,500 man a tling tawh a; Rs. 350 man chu Rs. 1,300-1,500 vel leh Rs. 240 man chu Rs. 1,000-1,200 velin hmuh tur a awm.
Sorkarin December 21, 2018 aṭanga January 14, 2019 chhung atan chauha dry day a puan chhungin Assam zu, Mizoramah lak luh a awm tam lo a, sorkarin March 10, 2019 thleng dry day a puan chhunzawm hnuah Assam zu (for sale in Assam only tih inziak) lei tur a awm chho ṭan.
Hetih lai hian Aizawlah rakzu chu lei tur a awm deuh reng a, mahse, dry day puan a nih hma aiin a to thung. Tun dinhmunah rakzu fûn khat Rs. 50-a zawrh a ni tlangpui a, wine shop hawn a nih hma aiin fûn khat hi a tlem zawk.
Vanglaini palai zawhna, Lailapur leh Bagha-a wine shop neitute'n an chhàn danin, Mizoram sorkarin dry day a puan hnuah zu an hralh tam sawt a; Lailapur leh Bagha-a wine shop ṭhenkhat chuan an zu zawrhte chu a man inziak (maximum retailed price) aia to tein an hralh.
Mizoram sorkarin Mizoram Liqour (Prohibition & Control) Act a hman hnuah Lailapur-a wine shop-te chu an khâr deuh vek a, wine shop awm chhun pawh a tlaran hman hle.
Sorkar agency-a zu zawrh tihtawp a nih hnu leh dry day puan a nih hnuah erawh chuan Lailapur-a wine shop awm chhun chu tihlen a nih bakah, zu pawh a chi kim zawkin an zuar leh tawh. Lailapur-a wine shop nei ṭhin, Bagha lama insawn tawhte pawhin Lailapur-a wine shop hawng leh turin an inbuatsaih mek niin an sawi.
Vairengtea Excise & Narcotics department checkgate-a duty-te chuan Vanglaini palai zawhna chhangin, sorkarin dry day a puan hnuah uluk leh zuala zu dap hna an thawh thu an sawi a, "A hlâwm lian man chu kan la nei lo a, kan man tam ber chu case pasarih a ni," an ti.
Dry day a puan a nih hnuah Vairengteah Excise & Narcotics enforcement staff dah belh a la ni lo a, MLPC Act hman ṭan a nih hnua Vairengtea awm ṭhin an sawn chhuah bângte chiah an awm chhunzawm a ni.
Zu khap bur a nih lai khan Vairengtea Excise checkgate-ah hian ṭum khata mi pakua vel an in duty chhâwk thei a, uluk zawkin zu an enfiah thei. MLPC Act hman hnuah (tun dinhmunah) erawh chuan ṭum khatah mi pali vel an in duty chhâwk thei a ni.
Hetih lai hian, Vairengtea Excise & Narcotics checkgate hi Saipum leh Serkhan-Bagha road lam aṭanga hêl theih a ni a; tunlaiin zu laluttute'n he lam kawngah hian an hêl nasa hle. heng kawngahte hian Excise & Narcotics enforcement staff duty dah an la ni ngai lo nia thu dawn a ni.
Vairengte aṭanga thu dawnna chuan, sorkarin dry day a puan hnuah Lailapur lama ruihhlo la tura kal an pung.