Zu zuarte Court-a zualko an tum

Mizoram sorkarin dan hnuaia zu zuar tura permit a pek (vendor)-te chuan zu eng emaw zat an lei sa hralh theih loh vanga man sum tam tak an hloh loh nan High Court-a zualko an tum a, vawiin hian an ukil-te'n Gauhati High Court, Aizawl Bench-ah petition thehluh an tum.

Vendor-te chuan media mite an kawmnaah, MNF a sorkar a, December 21, 2018 aṭanga January 14, 2019 thleng dry day a puan chu thil tih âwm loh nia an hriat loh thu an sawi a, "Mahse, January 14 a ral hnuah, January 15 aṭanga March 10 thleng an pawhsei leh avangin kan zu chah sa tihral lohin a awm ang tih kan hlau a, kan zu chah sa lo thleng tawh leh la thleng mekte chu engmah hlép awm lo leh hralhna awm loa a rîral kan hlau a ni," an ti.

Dan anga sorkarin zu chawlut tura a tih laiin dry day an puang thut tih sawiin vendor-te chuan, "Lak khawl sa pawh tihral ngaihna a awm ta lo. Dry day an puan hma daih khan challan siamin sorkarah chhiah tam tak kan pe lâwk a, dry day chhung zawng pawhin truck tam tham tak a lo thleng a, kan unload mek a, unload tur truck tam tak pawh a la awm a ni," an ti a; cheng vbc. 40 chuang man zu dah khawl sa a awm niin an sawi.

Vendor-te chuan, sorkarin pertmit a pek avangin bank-ah loan tam tham tak tak an pûk thu sawiin, "Mi in luahin thawktu tam tak kan chhawr a, mimal in kan luah man tam tak kan chawi thlâwn mek. Kan mi chhawrte hlawh pek bakah, electric bill nen lam kan chawi thlawn mek a, kan harsatna hi sorkarin min hriatpui se kan duh," an ti.

Inràwn khawmna awm loa hun rei tak dry day puan chu inpalzûtna nasa tak nia an ngaih thu sawiin vendor-te chuan, "Zu khap burna dan puan hmain sum tam tak kan hman ralna hi tihralna hun pe phawt se kan hrethiam. Kan zu zawrh theihna permit hi March 2019-ah a tawp dawn a, prohibition min puan hnan mai chuan kan tan chuan loan rulh tur a tam dawn vangin a hrehawm tak zet a ni," an ti. Chief minister Zoramthanga an hmuh pawhin beisei tur awma an hriat loh thu leh, chu vang chuan Court-a zualko mai loh chu tih theih an nei loh thu an sawi bawk.