Sorkarin ramri atan BEFR, 1873 A pawm tih HM-in House a hrilh
Nimina Assembly session-ah Home minister Lalchamliana chuan, Mizoram sorkarin state dang leh ramri atana a pawm chu Bengal Eastern Frontier Regulation (BEFR), 1873 a nih thu House a hrilh.
Congress Legislature Party (CLP) leader Zodintluanga zawhna chhangin Home Minister chuan, Assam leh Mizoram sorkar ramri atan Mizoram sorkarin BEFR, 1873 hmanga August 20, 1875-a Inner Line Notification tihchhuah a pawm thu leh, Mizoram leh Tripura, Manipur, Myanmar leh Bangladesh ramri atan BEFR, 1873 hmanga March 9, 1933-a Inner Line Notification tihchhuah a pawm thu a sawi.
June 2019-a Assembly session neih ṭuma Home Minister-in ramri zir chian mek a nih thu a sawi tih tarlangin Zodintluanga chuan, "Ramri pawm chin November 2019-a a sawi thei hi a fakawm hle. Ramri chin sorkarin a pawm hi humhalh turin eng angin nge ruahmanna a siam?" tiin a zawh belh a ni.
CLP Leader chuan, chief minister Zoramthanga'n ramri chinfel dan tur strategy an neih tawh thu leh a la sawi duh rih loh thu a sawi tih sawiin, "Ramrî-ah harsatna chi hrang hrang kan tâwk ṭhin. Zirlai pawl leh mi ṭhahnemngaite'n an buaipui ṭhin a, mipuite kan chîâi a ni," a ti a; mipuite engmah hre loa an awm ai chuan, Chief Minister-in a chinfelna a hriat chu sawi chhuak turin Home Minister a ngen bawk.
Home minister Lalchamliana chuan, sorkar hmasa aṭangin ramri zir chiangtu tur Core Committee din a nih thu sawiin, "Sorkar tharah pawh Core Committee hi a ding chhunzawm a. Assam emaw, central sorkar nena ramri chungchang kan sawiho huna kan ṭan chhan tur document pawimawh an khawn khawm a, an zo thawkhat tawhin ka hria," a ti.
Document tihfel a nih hnuah ramri chu state sorkar chauh buaipui chi a nih loh thu sawiin Home Minister chuan, "Political party leh NGO-te kan ráwn ang a, Mizoram tana ṭha ber tur kan ngaihtuah," a ti a; CM thil hriat chu a phalna lo chuan a sawi theih loh thu a sawi.
MNF member Dr Vanlalṭanpuia zawhna chhangin Home Minister chuan, "Zophai velah India Tibetan Border Police leh BSF an duty tih chanchinbua tarlan kha ka lo hmu ve a, police-te'n an zawh chianna aṭangin an duty lo. NRC puan a nih dawn khan law & order-ah harsatna thleng a awm theih avangin Hailakandi district velah chuan an duty thu an sawi a ni," a ti.