Prevention of Child Abuse Day hman a ni

Nimin November 19 khan khawvel pum huapa naupangte chunga hleilenna dona ni, 'World Day for Prevention of Child Abuse' a ni a; he ni pual hian Aizawl leh district dang ṭhenkhatah hun hman a ni.

World Day for Pre­vention of Child Abuse pual hian Mizoram State Child Protection Society (MSCPS), Women and Child Development depart­ment leh Gauhati High Court, Aizawl Bench-te chuan RB McCabe Hall, Aijal Club-ah 'Child protection in Mizoram' thupui hmangin conference an buatsaih a; Gauhati High Court, Aizawl Bench registrar Helen Dawngliani'n kai­hruaiin, Gauhati High Court judge Juctice Michael Zothankhuma'n a hmanpui.

Conference on Child protection in Mizoram-ah hian naupang venhimna lama thawktu hrang hrangte telin, MSCPS, Mizoram State Commission for Protection of Child Rights, Mizoram State Legal Services Authority leh Aizawl Police Station-a Crime Against Women Cell-a hotute'n an hnathawh dante an sawi a; naupang venhimna kawnga thawhho zel dan tur leh hmalak zel dan tur an sawiho bawk.

World Day for Prevention of Child Abuse hi district hrang hrangah Women and Child Development hnuaia District Child Protection Unit (DCPU)-te huaihawtin hman a ni. District Education Officer-te nen thawkhoin, sikul hrang hrangah naupangte hlim taka an awm theihna tur leh venhimna tur thu ziak târ a ni a, district tinah car flag siama sem a ni. Aizawlah chuan Superintendent of Police kaihhruaina hnuaiah police motor-ah leh police station-ahte car flag tar a ni a, traffic police-te’n an sem a ni. Hmun hrang hrangah banner tàr a ni bawk.

Mamit DCPU chuan naupangte humhalhna ni pual hian rally an buatsaih a, district bawrh­sap Dr Lalrozama'n hmanpuiin, rally-a telte a vai­liam. Dr Lalrozama chuan, naupangte chu venhim ngai, áwm ném zawk leh chak lo zawk an nih avangin upa zawkte'n uluk tak leh theihtawpa an enkawla an venhim a ngaih thu a sawi a; naupangte thlamuanga siamtu leh thlamuantu ni ṭheuh turin mi tin a sáwm.

World Day for Prevention of Child Abuse Rally hi Mamit Charkawn aṭanga ṭanin, hmun pangaah inkhawm tawi neih a ni a; khawvela naupangte chunga hleilenna thleng ṭhin duh lohna lantir a nih bakah, naupangte chunga hleilenna dona atan signature campaign neih nghal a ni.