Assembly session ṭan a ni

Mizoram Legislative Assembly pariatna ses­sion vawi lina chu nimin chawhma dar 10:30 khan Assembly House-ah ṭan a ni a, ni thum awh tur  niin, vawiin leh nak­tukah chhunzawm a ni ang. Session ṭan a nih hmain Governor PS Sreedharan Pillai hoin House tualah member-te'n thla an la a ni.

Session ṭan a nih hnuah MLA hlui thi ta Thankima sûnna hun hman a ni. House leader Zoramthanga chuan Thankima chanchin sawiin, "Pa ṭha tak a ni a, theihtawpa hna thawh duh mi a ni," a ti. Deputy house leader Tawnluia, Congress Legislature Party (CLP) leader Zodintluanga leh Lalduhoma ten uina thu an sawi hnuah, amah sûn nan ngawi rengin member-te minute khat an ding.

Thankima hi March 15, 1930-ah a piang a, October 5, 2019 zing dar 9:45-ah cancer vangin a thi. Kum 1952-ah matric pass-in kum 1954-ah Indian Navy-ah a lut a; kum 1964-ah MNF zawmin, ramhnuai sorkarah supply minister a ni ṭhin. Kum 1987 MLA inthlanah MNF president Laldenga bial pahnihah a tlin a avangin a chhuahsan zawk Sateek bialah MLA atan thlan tlin a ni.

Nimina session-ah hian paper pahnih pharh a ni a, report pali present a ni. Dr K Bei­chhua official resolution, 'Scheduled Tribes and Other Traditional Forest Dwellers (Recognition of Forest Right Act), 2016' hman tawh loh rawtna pawm a ni. Tun ṭum session atana Health minister Dr R Lalthangliana bill put luh, 'The Mizoram Anatomy (Amendment) Bill, 2019' pawm a ni bawk. Assembly session hi vawiin leh naktukah chhunzawm a ni dawn a, zawhna leh chhanna hun leh sorkar thil pawimawhte ngaihtuahna atana hman a ni ang.