KHAWTHLIR

Home minister Lalchamliana chuan nimina Assembly session-ah Independent member Vanlalhlana zawhna chhangin, kuminah Janua­ry 2019 aṭanga nimin t­hleng khan Inner Line Permit (ILP) 1,50,641 pek a nih tawh thu House a hrilh.

November 18, Thawhṭanni zan dar 7:30 vel khan Lalramluaha (38), Damdiai khua chu a khawsak mekna, Dur­tlanga Suaka Venga khâmah a tla hlum. Thu dawn danin, Lalramluah­a hi Durtlangah mi in luaha awm a ni. Thawhṭanni zana a tlakna khâm hi bawlhhlawh leh leivûng paihna hmun a ni a, leivûngah a tawlh sual palh nia hriat a ni.

Nimina Assembly session-ah Health minister Dr R Lalthangliana chuan independent member VL Zaithanzama zawhna chhangin, October 1990 aṭanga September 2019 thlenga Mizorama HIV kai hmuh chhuah tawh zat chu mi 20,976 an nih thu House a hrilh.

Assembly Speaker Lalrin­liana Sailo chuan nimin Assem­bly session-ah tun ṭum session-a panel of chairman atan Vanlal­hlana (independent), ­KT Rokhaw (INC), Dr ZR Thiamsanga (MNF) leh C Lalmuanpuia (MNF)-te ruat an nih thu a puang.

PWD chuan nimin aṭang khan Ai­zawla Chawnpui kâwnah kawngpui siam hna an thawk ṭan a, hei vang hian hna thawh zawh a nih hma chuan ni tin zing dar 8 aṭanga tlai 5 inkarah lirthei tlân tlang theih a ni dawn lo tih, Aizawl Traffic SP Ro­dingliana Chawngthu chuan thupek chhuah­in a tarlang. Thupek hian chhiat­rupna leh rîkrum thila duty, dan leh thupek pawimawh bika duty-te chetvelna a huam lo thung.

Zoram Medical College (ZMC)-a Department of Community Medicine chuan sorkar laipuia Census Operation leh AIIMS, New Delhi-te thawhpuiin nimin khan an hmun­ah Aizawl district-a part-time enumerator-te tan 'Verbal autopsy for maternal death' chungchang zirna an buatsaih a, ZMC director Dr L Fimate-in a hawng. Training hi India rama project thar MINErVA hnuaia kalpui a ni a; a tum chu - nu nau chunga thihna (maternal death) a awmin, thih chhan dik tak chhui chhuah a ni.

Agriculture minister C Lalrinsanga chuan Congress Legis­lature Party (CLP) leader Zodintluanga zawhna chhangin, Mizoram Legislative Assembly session neih taka Chief Minister leh minister-te'n NLUP dawngtute an account-a lût tawh pek vek an ni ang tih assurance a pek chu beneficiary-te ngeiin an dawng vek tawh tura ngaih a nih thu a sawi.