Ruahsûr vangin kawng siam hna Kan thawk chak thei lo - CM

PWD changtu chief minister Zoramthanga chuan, ruahsûr avangin an duh angin kawng siam hna an thawh chak theih loh thu a sawi a, "Khua a ṭhat veleh kan bûr nghal char char a ni," a ti.

Independent MLA C Lalsawivunga chuan, kawng siam avanga lawmthu sawina resolution pass a nih tawh laiin, a hnu hun rei lote chhungin kawngpui a chhe leh vek nia sawiin, "Kal a hrehawm em em a ni," a ti a; kawng siam a chhiat hma chhan a zâwt.

Chief Minister chuan, "A chhe lai a awm a, a chhe lo lai pawh a awm, a chhe vek bik lo. Kum thar aṭangin kan che ṭan a, kawngpui lianpui siam tharna hman a awm lo. A chhe zual lai thawm ṭhat kha kan tih hman tâwk a ni a, chutah patching ti tur hian roadroller a ngai a, duh ang zat kan nei lo a ni," a ti.

Roadroller 20 lei turin ruahmanna an siam vat thu sawiin Zoramthanga chuan, "Roadroller lei kan han tum a, Election Model Code of Conduct-in May thla thleng min phuar zui a, chumi hnuah roadroller chu a lo thleng ve mai a, June a ni a, fûrin a zui a ni," a ti a; rin aiin kawng an siamṭha tam hman zawk niin a sawi.

CM Zoramthanga chuan, kawngpui siamte chu a tìr aṭanga siamṭha vek an nih loh thu sawiin, "A chhe zual lai siamṭha mai kan ni a, fûrah a chhe hman a ni. Hna thawk chhunzawm leh turin kan inpeih a, kar khat âwrh chauh khua a ṭha a, duh angin kan la che hman lo," a ti.

Independent member Lalduhoma zawhna chhangin Chief Minister chuan, Thenzawl-Zote kawng siam hna chu Nayak Infras­tructure Pvt. Ltd.-in an thawh thu a sawi a, "Estimated amount chu cheng nuai 1204.25 a ni," a ti a; kawng siam hna chu December 2018-ah zawh a nih tawh thu a sawi.