Aizawlah 65th National School Games Boxing U-17 ṭan a ni

Sikul naupang, kum 17 leh a hnuai lamte inelna, 65th National School Games Boxing U-17 chu nimin khan Mualpui, Aizawla R Dengṭhuama Hall-ah ṭan a ni a, School Education minister Lal­chhan­dama Ralte-in a hawng.

Lalchhandama Ralte chuan, intihsiaknaa tel zawng zawngte chu chakna, theihna leh thiamna an neih hmanga hnehna chan tum tur leh theihtawp chhuah turin a fuih a, Mizorama an châm chhung­in remna leh muanna hnuaiah hlim taka awm turin duhsakna a hlan.

School Education Minister chuan, Natio­nal School Games neih chhan chu, zirlaite taksa leh rilru tihhmasawn a pawimawhzia a taka lantir a ni tih sawiin, "He intihsiakna hian zirna-inte'n zirlaite ṭhan lenna atana infiamna kan dah pawimawhzia a tarlang. Games-ah hian infiammi ṭha ber berte che vel kan hmuh ngei ka beisei," a ti.

65th National School Games Boxing U-17 (Boys) hi November 19-22, 2019 chhunga neih tur a ni a; nimina a hawnna inkhawm hi School Education secretary Esther Lal Ruatkimi'n a kaihruai a, India ram hmun hrang hrang aṭanga infiammi tel zawng zawng hnenah ngaihhruina thilpek hlan a ni.

Games-ah hian India ram state leh unit hrang hrang 36 aṭangin boxer 413 leh official 73, an vaiin mi 486 an tel a; weight category 13-ah inelna buatsaih a ni ang.