Vawk lakluh dan House-ah pu lut
Nimina Assembly session-ah independent MLA Lalduhoma chuan calling attention motion a pu lût a, vawk buaipui a duh dan House a hrilh. AH&Vety minister Dr K Beichhua pawhin vawk chungchanga sorkar hmalaknate a sawi.
Lalduhoma chuan, ram dang aṭanga vawk lak luh aṭanga PRRS lêng avangin vawk vulhtute'n vawk tam tak an chàn thu sawiin, "Ram dang aṭanga vawk lak luh khap a ni a, tih âwm reng a ni. Chutih laiin, vawk sâttute'n harsatna an tâwk a, sah tur an nei tawh lo a, mipui pawh an mangang a ni. Ramri-ah vawk a hrisel leh hrisel loh endiktu tur dah ila, vawk hrisel chu lak luh phal ila, tuna kan harsatna hi a ziaawm a rinawm. Sorkarin hma la vat se," a ti.
Vawk lak luh phalna licence mi tlemtê pek an nia a hriat thu sawiin Lalduhoma chuan, "Vawk lak luhte hi ramri-ah endik a nih loh chuan harsatna kan tâwk ang. Chu ai chuan, a duh apiangin lak luh ni se, endik ni zawk se. Hmun ṭhenkhatah an man a, tlawm tê têin an lilám tihte a awm a, a rî a mawi lo hle," a ti a; vawka mipuiin harsatna an tawh chu sutkian vat a ṭul thu a sawi.
Lalduhoma chuan, vawka Mizote kan intodelh theihna atan hmalak a ṭul thu sawiin, "Farm nei duh an awm chuan SEDP aṭangin ṭanpuinate pe ila; party induhsak zawnga kal loin. MLA-te pawhin chutiang farm nei duh an hriatte chu rawt se, chu'ng rawtnate chu department-in ngai pawimawh se," a ti.
Speaker Lalrinliana Sailo-in a sàwm angin AH&Vety Minister chuan an hmalaknate a sawi a, "Kum 2013, 2016 leh 2018-ahte PRRS a léng a, vawk vulhtute leh mipuiin an tuar hle. Vawk a vàn chhanah chuan PRRS a tih loh theih loh a, PRRS a lèn lohna atan kan tih theih chu invèn a ni. Kuminah khawchhak lamah PRRS aia hlauhawm African Swine Fever (ASF) a lêng leh a ni," a ti a; ASF kai vawk chu an thih vek thu a sawi.
Dr K Beichhua chuan, Myanmar ramah ASF a léng tih hriat a nih hnuah June 10, 2019 khan ministry aṭangin invèn hna nasa taka thawk tura tihna lehkha an dawn thu sawiin, "June 19-ah DC tinah lehkha thawnin, Cr.PC 144 hmangin hma kan la. ASF hi a léng a nih chuan tuna vawksa a váng kan tih hi kan ngai ngawih ngawih zawk ang," a ti.
AH&Vety Minister sawi danin, Krismas a hnai a, mipuiin sa ei tur an neih theihna atan hma a la a; notification chhuahin, AH&Vety aṭanga phalna neite tan ram chhung state dang aṭangin vawk talh tur lak luh phal a ni. Vawk talh tur la luttute'n talh theih tur, a puitling tawh chiah an la lut tur a ni a, an lak luhna hmun aṭangin vawk hrisel a ni tih finfiahna an nei tur a ni. Vawk lak luhte chu Vairengte-a AH&Vety checkgate-ah enfiah leh vek a ni bawk.
Vawk lak luh phalna nei mi 17 an awm tawh a, chu'ng mite chu vawk 3,845 lak luh phalsak niin, vawk 762 an la lut tawh. A duh tan vawk lak luh phalna dil theih reng a ni.