Nupui thattu dam chhunga táng turin hrem

Aizawl District Court chuan Vanlalnuna (39) s/o Biakthanga, Tahan C group, Myanmar chu a nupui Cheuzakimi a thah avangin a dam chhunga jail-a táng tur leh Rs. 3,000 chawi turin a hrem.

Vanlalnuna tualthah thubuaiah hian Additional District & Sessions judge Liansangzuala chuan nimin khan thutlukna (judgement order) a tichhuak a; Vanlalnuna chu IPC Section 302 (tualthah thubuai) hmanga thiam loh chantirin, a dam chhunga (a thih hma zawng) táng tur leh Rs. 3,000 chawi turin a hrem a ni. Myanmar aṭanga India rama lut a nih vangin Foreigners Act, 1946 Section 14 hmanga hrem tel a ni bawk. Vanlalnuna hian a pawisa chawi tur a pek loh chuan thla thum dang a tân belh ang.

Judgement order-a a lan danin, Vanlalnuna leh a nupui Cheuzakimi te chu Nghaltan (Maubawk ram)-ah K Ramherliana, Khatla East huan enkawla awm an ni. Vanlalnuna hian a nupui Cheuzakimi chu uire-ah puhin, August 7, 2017 khan Nghaltana an hnathawhna thlámah a sawisa a, a hnuah Cheuzakimi chu a hliam tuar loin a thi a ni.

He thil thleng chungchangah hian huan neitu K Ramherliana chuan Aizawl Police Station-ah FIR a thehlut a; Vanlalnuna hian a nupui chu tihhlum tuma kutthlak a nih loh thu sawi mah se, Court chuan finfiahna hrang hrang hmangin thiam loh a chantir a ni.