Bail theih lohna dan kaihhnawiha mante Thu zawhfiah hnuah chhuahtir nghal an ni

Vairengte Arsa Zuar Association (VAZA)-te'n arsa (puah sa) an thawn chhuah, All Mizoram Poultry Farmers' Association (AMPFA) mite'n Lungdai bulah lo chhuhsaka an paih chungchangah Bawngkawn Police Station-ah thubuai ziah luh a ni a; AMPFA mi leh sa ṭhenkhatte chu man an nih hnuah chhuahtir leh tawh an ni. Hetih lai hian, thubuai ziah luha dan tlawhchhan pakhat IPC 392 chu bail-a chhuah theih lohna a ni.

Tarlan tawh angin, November 15, 2019 (Zirtawpni)-a VAZA-in arsa Rs. 6,72,000 man, Aizawl leh khawpui dang ṭhenkhata pek tur lirtheia an thawn chu Lungdai leh Sihphir inkarah lo lambunin, an chhuhsak a, arsa eng emaw zat chu khâmah an paihsak a ni.

Hemi chungchanga AMPFA-in November 18, Thawhṭannia Aizawl Press Club-a press conference an neih ṭumin press mite zawhna an chhannaah, Lungdai bula VAZA arsa lo chhuhsaktute chu an mi leh sate an nih thu an lo sawi tawh bawk.

Arsa chhuhsaktute chu November 16, Inrinniah police-in an man a, thu zawhfiah an nih hnuah an chhuah leh nghal mai nia thu dawn a ni. AMPFA hruaitute'n press conference an neihnaah, "An man thu kan hriatin a huhoin police station-ah kan kal a, minister leh MLA-te'n min puih avangin tunah chuan police-in an chhuah leh vek tawh a ni," tiin an sawi.

Arsa inchhuhsak leh paihsak chungchangah hian VAZA hruaitute chuan November 15-a FIR an thehluh hnuah, November 16-ah pawh Bawngkawn Police Station-ah FIR an thehlut nawn leh a; Bawngkawn PS case no. 373/2019 ziah luh a ni. Indian Penal Code (IPC) 341 leh 392 tlawhchhanin thubuai ziah luh (case register) a nih thu, Aizawl SP C Lalzahngoa chuan Vanglaini palai a hrilh.

Indian Penal Code (IPC)-a a lan danin, Bawngkawn PS-a thubuai an ziah luhnaa dan tlawhchhan pakhat IPC 341 chu mi tihbuai (wrongful restrain - mi lirthei khalh lai tihbuai) chungchang a ni a, he dan hmanga thubuai siamsakte chu bail theih (bailable) an nih bakah, thubuai nêm deuh niin, non-cognizable offence a ni. Hremna chu thla khat chhung tàntir emaw, Rs. 500 aia tam lo chawitir emaw, a pahnih emaw hrem theih a ni.

Dan tlawhchhan pakhat dang, IPC 392 chu mi rawk/suam (robbery) thubuai ziah luhna a ni a, court/magistrate phalna la hmasa loin police-in pawi khawihtu an man thei. Thubuai lian thama ngaih, cognizable offence a ni a, thubuai siamsak (accused) chu bail theih a ni lo. He dan hnuaia thiam loh chantir chu kum 10 thleng tàntir leh pawisa chawitir theih a ni a, zan lam (ni tlak hnu leh zing ni chhuah inkar)-a lamliana inrawkna/insuamna a nih chuan kum 14 thleng tàntir theih a ni bawk.