KHAWTHLIR

Nimin Assembly session-ah chief minister Zoramthanga bill put luh pahnih, 'The Mizoram Protection of Interests of Depositors (in Financial Establishment) Bill, 2019' leh, 'The Mizoram Transparency in Public Procurement (Amendment) Bill, 2019' te chu sawiho a nih hnuah pass a ni.

Excise & Narcotics department chuan October 2019 chhung khan zu zuar mi 152, zu rûi mi 11 leh rak zu litre 11,789.25 an man. October thla chhûng vék khan zu bilh lai ṭín 11,921, dàwidim kg. 282.5, sap zú (IMFL & foreign liquor) úm 1,418, beer úm 9 leh can 160, apple juice úm 2,640 leh litre 3,421.4, BEDC (Burma zu) litre 14.4, zu siamna bél 64 an man bakah, zu kaih­hnawihah lirthei pakua an man bawk.

Chief Minister's Relief Fund-ah tun hnai khan Operation Blackboard Association-in Rs. 80,000 leh Hnahthial Town Village Council Association-in Rs. 10,000 an chhûng lut.

Tun hnaia Mizoram sorkar tirha Puducherry-a press study tour neia zin MJA member-te chuan nimin khan Ai­zawl Press Club-ah an zin report an pe. Report pek inkhawmah hian MJA president Zonunsanga Khiangte, MJA lama an leader A Zotin­khuma leh IPR dept. lama an hotu IPRO Andrew H Lalremruata-te'n thu an sawi a, an zin chu hlawkthlak an tih thu leh an zinna tur ngaihtuah saktu Mizoram sorkar chunga an lawmthu an sawi a ni.

Khawzawl DC H Lianzela hoin nimin khan DC Conference Hall-ah Krismas leh kumthar lo thleng tura mipui himna leh ralmuanna atana hmalak dan tur sawiho a ni a, Khawzawla sorkar hotute leh tlawmnngai pawl hrang hrang hruaitute an tel. Meeting chuan, December 22, 2019 aṭangin Khawzawl­a YMA branch 10-ah duty post siama duty an rèl bakah, police-te patrol turin an rél a ni.

School Education minister Lalchhandama Ralte chuan independent member Vanlalhlana zawhna chhangin, January 2019 aṭanga nimin thleng khan zirtirtu 972 lak a nih tawh thu a tarlang a, "Heng zirtirtu lakte hi advertisement siam loa lâk an awm lo," a ti.