Hmarchhaka cancer hospital ṭha ber Din turin hma kan la - Health Minister

Health & Family Welfare minister Dr R Lalthangliana chuan, Japan International Cooperation Agency (JICA) nen ṭangkawpin India ram hmarchhak biala cancer hospital ṭha ber din turin hma an lak mek thu nimin khan Assembly House a hrilh.

MNF member Dr F Lalnunmawia zawhna kal zelah Dr R Lalthangliana chuan, August 14, 2019 khan Cancer Super Speciality Hospital dinna atan JICA-in cheng vbc. 500 a phalsak thu a sawi a, "JICA pawh naktukah an lo kal dawn a, kan sawiho dawn. Kan tipuitling thei a nih chuan India hmarchhaka a ṭha ber siam theih kan beisei," a ti.

Health Minister chuan, Aizawl Civil Hospital (ACH)-a ICU-ah khum indaih loh a nih thu sawiin, "Building thar berah dah belh turin ngaihtuahna kan sêng mek. ACH tichangtlung zel tur hian tuna thil harsa chu ram neih kan nei tawh si lo hi a ni. A tualzáwl­ah Trauma Centre sak kan tum a, a chènchilh doctor kan nei miah lote hi a buaithlak," a ti a; ACH hmasawnna atan thuràwn engtik lai pawha an dawn theih thu a sawi.

Dr R Lalthangliana chuan, tun hnaia sub-centre hrang hrangah mipa leh hmeichhe health worker an dah theih loh chhan sawiin, "Hun rei tak health worker-te health supervisor-ah an kaisan theih loh hnuin, tun hnai khan 82 an kaisang a, anni hi an post sub-centre a ni tawh si lo. Health worker 200 vel nakkum lama lak theih kan inbeisei a, chumi hunah chuan kan dah thei vek tawh ang," a ti.