Lawngtlaiah Children's Carnival buatsaih

Nimin kha Universal Children's Day (khawvel pum huap naupangte ní) a ni a; he ni pual hian Lawngtlai District Child Protection Unit (DCPU) chuan Lawngtlaia Central YLA khelmualah naupangte intihhlimna kût, Children's Carnival an buatsaih.

Children's Carnival hi Lawngtlai DC Shashanka Ala-i'n a hawng a; thu sawiin, Universal Children's Day chu naupangte nun hlimawm leh thianghlim tak lawmna a nih angin, naupangte'n hlim taka hun an hmanna tur carnival buatsaih a ni chu lawmawm a tih thu a sawi a, "Naupangte chu chhungkua leh khawtlangah an himin an hlim tur a ni a, naupangte himna leh hlimna tur ngaihtuah chu mi tin mawh a ni," a ti.

Khualzahawm Amit Goel, Lawngtlai SP pawhin thu sawiin, "Naupangte hi ram hma hun in­nghahna an nih avangin seilenna boruak ṭha kan siamsak tur a ni," a ti a; naupang chunga hleilenna hrang hrang do leh naupangte'n hum sual an dai lohna tura venhim chu khua leh tuite mawhphurhna a nih thu a sawi.

Carnival-ah hian sikul naupang ṭhahnem tak an tel bakah, sorkar department hrang hrang officer-te leh tlawmngai pawl hruaitute an tel a; a hawnnaah Lawngtlai district child protection officer Mary Lalremruati'n Universal Children's Day a sawifiah.

Children's Carnival-ah hian naupangte intihhlimna tur infiamna hmanraw hrang hrang chhawp a ni a, intihsiaka lawmman dawn theihna tur eng emaw zat siam a ni. Universal Children's Day hi kum 1954 khan a vawi khat nan United Kingdom-ah hman a ni a; naupangte dikna chanvo leh ham­ṭhatna atan kum tin November 20-ah hman ṭhin a ni. Hetih lai hian, khawvel ram hrang hrangin anmahni ram bikah Children's Day an nei hrang a, India ramah pawh Children's Day chu November 14 a ni.