FCSCA-in gas chungchang sawifiah

Food, Civil Supplies & Consumer Affairs (FCSCA) department chuan thuchhuah siamin, Mizorama eirawngbawlna gas (LPG) harsatna sukiang turin FCSCA department-in theihtawp a chhuah mek niin an tarlang.

FCSCA department chuan, hun eng emaw aṭangin kawng chhia vang leh chhan dang hrang hrang vangin Mizoramah LPG hnianghnârin mipuite'n an dawng thei lo tih sawiin, "Sorkarin theihtawp chhuaha hma la zelin, ngun taka vilin a en reng a. Gas distributor (agent)-te'n ni tina gas cylinder an dawn zat leh an semna leh an sem lehna tur vengte nen report siamin, FCSCA-ah an thehlut ṭhin. Report chu ni tinin mipui hriattira puanzar turin IPR department-ah pek ṭhin a ni," an ti.

Gas sem dan report chu a duh dan en leh hmuh theih a nih thu an tarlang a; a duh apiang tan FCSCA (Inspecting Room) telephone no. 0389-2314175-ah zawh theih a nih bakah department website https://fcsca.mizoram.gov.in/ ah en theih a ni.