All India Cooperative Week khâr a ni

Cooperation department leh Mizoram State Cooperative Union (MSCU)-te chuan nimin khan Vanapa Hall-ah 66th All India Cooperative Week, 2019 khârna inkhawm an buatsaih a; chief secretary Pu Lalnunmawia Chuaungo khuallian a ni a, Cooperation secretary JP Agrawal khualzahawm a ni.

Lalnunmawia Chuaungo chuan, Mizoramah cooperative society vangin hmasawnna a thleng mek nia sawiin, Mizoram Cooperative Apex Bank pawh Mizorama bank zingah hna thawk ṭha ber pawl an nih thu a sawi a, "Cooperative society hi hmasawn tuma duh záwng leh tuina inang mi hrang hrang kal khawmna a nih avangin pawl ṭha leh chak tak a ni a, hmun kilkhâwr zawk thleng phâk hmasawnna hna thawktu pawimawh tak a ni," a ti.

Chief Secretary chuan, cooperative society chu induhsak bik awm lohna leh rualkhai taka indâwm tawnna pawl a nih thu sawiin, hlawhtlin tuma bei tak takte zir chian a, a ṭul huna puitu ni ṭhin turin hruaitute a chah a; mahni tana ṭha tur leh hlâwkna turah sorkar inrawlh ngai loa mahni phâk tâwka hmalak tum ve ṭhin a pawimawh thu a sawi bawk.

Khualzahawm JP Agrawal pawhin thu sawiin, cooperative society-ah Mizo ṭhalai lehkhathiam tam zawk lut tura a duh thu a sawi a, "Mizoram hi khawtlang inpawh tak leh inthliarna awm lo a nih avang­in cooperation anga hna thawhna hmun nuam tak a ni," a ti.

All India Cooperative Week khârna inkhawm hi MSCU president K Lalchamreia'n a kaihruai a; Cooperation flag pawh pharhna hun leh Tlaugau special edition tlangzarhna hman a nih bakah, cooperative society eng emaw zatin an thil siamte lei theihin an pho chhuak a ni. Chief minister Zoramthanga, Cooperation minister C Lalrin­sanga leh National Cooperation Union of India president Dr Chandra Pal Singh Yadav ten Cooperation Week puala thuchah an ziahte ngaihthlak a ni bawk.

Cooperation department tarlan danin, Mizoramah state level cooperative society 11 leh primary level cooperative society 1,173 a awm mek a ni.