Hmun pahnihah heroin man

Excise & Narcotics department (END)-a Anti-Narcotics Squad-te chuan November 19 (Thawhlehni) leh nimin khan hmun pahnihah heroin gram 131 (hawng 10) an man a; heroin neitua puhte chu The Narcotic Drugs & Psychotropic Substances Act, 1985 tlawhchhanin thubuai an siamsak.

END enforcement-te hian Thawhlehni chaw­hnu dar 2 vel khan Mission Veng bazarah heroin gram 71 (hawng 5) leh a neitua puh mi pathum - Debbie Zodingliani (42) d/o F Sangkima leh Lalrinmawii (28) d/o Lal­nghinglova, Upper Republic nia inchhál ve ve leh, Laltlanthangi (54) d/o Zamana (L), Tlangnuam Vengthlang nia inchhálte an man.

Thawhlehni zan dar 9:30 leh nimin (Nilaini) chawhma dar 10:30 khan Aizawlah heroin gram 60 (hawng 5) an man leh bawk a; a neitua puh mi pahnih - Chawnghming­liani (39) d/o Biakchung­nunga, Kanan Veng, Aizawl nia inchhál leh Laldinpuii (30), Thingsai, tuna Mission Veng­thlanga khawsa mek nia insawite an man tel bawk.

END chuan, Aizawl mai bakah, Mizoram hmun hrang hrangah ruihhlo man tur a awm reng tih tarlangin, "Ruih­hlo dona kawnga ṭha­hnemngaia ruihhlo dotu hnathawkte ṭanpui a, ram tana ṭhahnemngai ṭheuh turin Mizoram mipui kan ngen a ni," an ti.