Mizoram MLA-te hlawh 130.77%-a tihpun a ni

Mizoram MLA-te hlawh tihpunna tur bill hi Parlia­mentary Affairs minister TJ Lalnuntluanga'n House-ah a pu lut. TJ Lalnuntluanga chuan, a bill put luh chu inthlahrunawm tak ni mah se, ni tin nuna mamawh sáng vangin member-te hamṭhatna tur chhawp chhuah a ṭul thu sawiin, "India danpuiin state legislature-te hlawh mahni state ṭheuha ngaihtuah tura thuneihna a pek avangin state hrang hrangah hlawh a inang lo hle a ni," a ti.

Parliamentary Affairs Mi­nister chuan, state hrang hrang­in MLA-te hlawh an ennawn thu sawiin, "Kum 2010 hnuah ennawn leh a ni. Mizoram MLA-te hian state dang MLA-in an tih ve loh damlo kan, ruang thawn leh mikhual thlente an ti a ni," a ti a; Mizorama MLA nih chu state danga MLA nih aiin a hautak bik niin a sawi.

MLA hlui intélkhâwm FLAM-in hlawh tihpun rawtna General Purpose Committee (GPC)-ah an thlen tih sawiin TJ Lalnuntluanga chuan, "FLAM rawtna hi ngaihtuahin GPC chuan hlawh tihsan ṭha a ti a. GPC rèl tawh chu Council of Minister pawhin a zah a, House-a put luh turin a ti a ni. GPC-ah hian party hrang hrang aiawh an kim vek," a ti.

MLA hlawh hman lai chu, an hlawhpui Rs. 40,000 bakah hamṭhatna (allowance) hrang hrang nen thla khatah Rs. 65,000 a ni. Nimina an pawm tâk ang chuan, MLA-te'n thla khatah an hlawhpui Rs. 80,000 bakah allowance hrang hrang nen Rs. 1,50,000 an la thei dawn. 

MLA hlawh tihpun rualin MLA pension hlawh pawh tihpun a ni a, thla khatah Rs. 20,000 aṭangin Rs. 40,000-ah tihpun niin, an tlin nawn chuan Rs. 5,000 zelin a pung dawn a ni. Hetihlai hian ZPM-in an thlawp independent MLA-te chuan MLA-te hlawh pun chu an duh loh thu an sawi a; Lalduhoma chuan MLA candidate atana chhawp chhuaktu Val Upa Council (VUC)-in MLA hlawh tihsan a duh lo a, hei bakah hian ram sum leh pai dinhmun enin hlawh tihsan chu an thlawp theih loh thu a sawi.

Lalduhoma, Independent Bill sawihonaa ding hmasa ber inde­pendent MLA Lalduhoma chuan, India rama MLA hlawh thlirin, communist sorkarna West Bengal leh Tripura-ah a hniam thu sawiin, "Tuna chhawp chhuah hi a laihâwl vel a ni. 7th Pay hman a ni ta bawk a, a hun thuah pawh ennawn a hun viau," a ti a, MLA-te chu a bèl chiang apiangin sum an hman nasatzia an hriat thu a sawi.

Lalduhoma chuan, thlirna danga thlirin, hlawh tihsan ṭha an tih loh thu a sawi a, "Keini hi candidate atana Val Upa Council (VUC) puan kan ni a, rinawm taka an thu zâwm turin ṭawngkam leh ziakin kan intiam a ni. VUC hian Bill hi pass lo turin min ngen a, technically chuan chu chuan min phuar lo a, mahse, min hringtu an nih avangin an thu zawm kan bá a ni," a ti.

Bill pass an duh loh chhan dang chu, sum harsat lai a nih vang a nih thu sawiin, "Cheng nuai 3 chhung tinin han dawng phawt se. GPC rorel zah tak chungin Bill hi dahṭha rih ila, pass rih loh hi kan duh dan a ni," a ti a; hlawh tihpun chu âwm ti mah se, hun danga ngaihtuah ni se an duh thu a sawi.

Zodintluanga Ralte, INC Congress Legislature Party (CLP) leader Zodintluanga Ralte chuan, MLA hlawh tihpun ngaihtuahtu GPC-ah a tel ve thu sawiin, "A ṭha tur te, a ṭha lo turte kan ngaihtuah. Study team kan siam a, anni'n recommendation an siam a ni. Chumi hnuah sub-committee din a ni leh a, uluk takin a nghawng tur, mipuiin min hmuh dan turte ngaihtuah a ni," a ti.

Zodintluanga chuan, kum 10 hnuah a punna tlem thei ang ber tur an ngaihtuah nia sawiin, "A ngaihtuahtu zingah ka tel avangin pass turin ka thlawp. Mimalin zalenna kan nei a, a duh tan chuan kan duh chin tâwk lak loh mai turah ka ngai," a ti a; hlawh pung anga hlawh lâk loh chu inthlahrunna tur awma a hriat loh thu a sawi.

Dr BD Chakma, BJP BJP member Dr BD Chakma chuan an hlawh pung tur chu lawmna tur awma a hriat loh thu sawiin, "Kan account-ah a lut ang a, a tukah kan sem chhuak leh nghal chur chur dawn a ni," a ti. Zoramthanga, House Leader Sawihona khaikhawmtu House leader Zoramthanga chuan, MLA hlawh atan rawtna chi hrang hrang an dawn thu sawiin, "FLAM aṭanga hlawh tihpun rawtnate a lo lut a. Study team kan siam a, chumi hnuah committee-te kan din leh a ni," a ti a; GPC-in recommendation hrang hrang an dawn aṭanga rawtna an siam angin MLA hlawh tur chu bituk a nih thu a sawi.

CM Zoramthanga chuan, hlawh tihpun chu MLA-te tan inthlahrunna tur tam tak a awm thu sawiin, "Inthlahrung chung chung pawhin hna thawh theihna atan tih a ngai. A u chuak lo, a laihâwl vel kan ni tih tur a ni," a ti. MLA-te hlawh tihpunna tur bill sawiho zawhah speaker Lalrinliana Sailo chuan, hlim taka session an vawng nung thei chu lawmawm a tih thu a sawi a, "I vawng nung zel ang u. Member-te ṭhahnemngaihnaah te, session hlawhtlin theihna atana department inpeknaah te, venhimna lama thawktute thawhrimnaahte leh Assembly Secretariat-a thawktute inpeknaahte lawmthu ka sawi a ni," tiin, ni thum awh session chu nimin chawhnu dar 1:45 khan a titawp a ni.