Lokayukta din kawngah kan thawk chak - CM

Vigilance changtu chief minister Zo­ram­thanga chuan independent member Lalduhoma zawhna chhangin, Lokayukta din chungchangah sorkar chu thawk chak an intih thu a sawi.

Zoramthanga chuan, Lokayukta-in ama pualin investigating staff leh prosecution staff a neih hrih loh thu a sawi a, "Lokayukta din tur hian central-in min nawrna a rei tawh. Sorkarna kan siam hlimin kan ngai pawimawh a, kan din rum rum a. Amah­erawhchu, appointment tih theih lohin Election Model Code of Conduct-in min phuar a ni. June aṭangin kan ti thei ṭan a, thla 3/4 emaw lek a la ni a, thawk chak kan inti khawp mai," a ti.

Prosecutor leh a dang la turin ruahmanna an siam thu sawiin Chief Minister chuan, "Thla 3/4 lekah chuan siam fel nghal theih a ni bik lo. Tihfel thuai kan tum a, a ṭul ang zelin kan hnawhkhat ang," a ti a; Congress sorkarin Lokayukta an din hman lo niin a sawi.

Chief Minister sawi danin, Lokayukta-ah hian chairperson, secretary, superintendent, ste­nographer grade-I, assistant, stenographer grade-II leh LDC (MR) pakhat ṭheuh, driver (MR) pahnih leh group D (MR) pali an awm mek a ni.