SSA& RMSA thawk ṭhinte an nuar ṭan Sorkarin 'No work, no pay' a kalpui

Samagra hnuaia thawkte intèlkhawmna, Federation of Mizoram Samagra Employees (FEMSE) chuan sorkara an thil phûtte Mizoram sorkarin a tihhlawhtlin loh avangin nimin aṭang khan a huhoin an chawl (mass casual leave) a, sikul eng emaw zat khâr a ni. Mizoram sorkar erawh chuan, mass casual leave zawma pisa kai lote chu an hlawh pawh hêksak an nih tur thu a tarlang.

FEMSE hian Samagra hnuaia thawkte'n Samagra norms anga regular pay scale an lak ve theihna tur leh School Education department hnuaia hna lak a nih dawnin, Samagra hnuaia thawk tawhte tan 70% hauh (reservation) turin sorkar an ngen a ni. Nimina thuchhuah an siamah, "Kan dilna leh duh sorkara kan thlente'n ngaihsak a hlawh tâk loh avang leh hmalakna duhawm hriat tur kan neih tâk loh avangin mass casual leave kan la ta a ni," an ti.

FEMSE hnuaiah affi­liated association paruk an awm a, member 4,000 chuang an awm mek. Nimin aṭanga mass casual leave an lâk avang hian district hrang hrangah Samagra hnuaia sikul 600 (P/S, M/S, H/S leh HSS) chuang leh SSA leh RMSA hnuaia office hrang hrangah thawktu an awm lo a, sikul eng emaw zat chu khâr a ni. Mass casual leave hi vawiin leh November 25, Thawhṭanni-ah an lak chhunzawm ang.

FEMSE chuan, mass casual leave an lâk vanga harsatna awmte an hmuh hmaih lo tih sawiin, "Sikul naupang, nu leh pa leh Zoram mipuite'n kan dinhmun hrehawmzia leh kan harsatnate min hriatthiampui a, kan hma­laknate min thláwp turin kan ngen a, kan hmalakna vanga harsatna tâwkte lakah ngaihdam kan dil a ni," an ti.

SSA leh RMSA hnuaia awm ṭhin chhùnfin a, Samagra tih taka thawkte chuan, SSA leh RMSA hnuaia an awm lai aṭangin an service leh hlawh chungchangah sorkar an lo dawr tawh ṭhin tih tarlangin, "Kan hlawh pawh kum 2011 aṭanga tun thlengin ennawn emaw, siamṭhat emaw awm loin kan hmang tawh a ni," an ti a; chutih laiin, sorkarin 7th Pay a hman tawh avangin FEMSE hmingin hma an la ta tih an sawi.

An press release-a tarlan danin, FEMSE hi August 16, 2019-ah din a ni a, din a nih hnu lawkah School Education Minister an hmu a, hlawh chungchangah hma an la nghal a ni. FEMSE hmingin Samagra norms anga hlawh pe ve tura dilna (Letter no. FEMSE/FCM-01/2019 dt.19.9.19) School Education Minister hnenah an thlen a, an dilna copy Chief Minister hnenah an pe bawk.

An hmalaknate'n awmzia a neih loh avangin November 8, 2019-a FEMSE Conference vawi khatnaah resolution an pass a; an thil phut chi hnihte chu tihhlawhtlinsak turin sorkar an ngen. An resolution chu kalphung pangngai angin School Education Secretary (Samagra State Mission Director ni bawk) hnenah an thehlut a, a copy pawh conference an neiha khuallian Assembly Speaker hnenah an pe tel a ni.

FEMSE chuan, Samagra Framework leh Financial Norms-a zirtirtute hlawh chungchangah, state norms anga pek tura tih a nih thu sawiin, "Hetih lai hian, state norms anga trained graduate leh trained undergraduate anga hlawh pek kan ni lo. Kan hlawh hi kum 9 dawn lai ennawn lohin a awm tawh bawk," an ti a; School Education department-a hnaruak hnawhkhah turah 70% reservation pek an phût chu Mizoram sorkarin a tih ngai loh a ni lo a, department ṭhenkhata CSS hnuaia thawkte tan reservation siamsak tawh ṭhin dan a nih thu an sawi bawk.

Hetih lai hian, Mizoram sorkar (Samagra Shiksha, Mizoram State Projector Director) chuan November 20, Nilaini khan Office Order tichhuakin, mass casual leave la zawng zawngte lakah 'No work, no pay' hman a nih tur thu a tarlang.

Samagra Shiksha SPD Lalhmachhuana chuan Mizoram pumah DEO, DPC leh SDEO-te chu an huam chhung ṭheuhah FEMSE thuchhuak anga Samagra Shiksha hnuaia thawk mass casual leave zawmte chhinchhiah a, mass casual leave lak ni-ah chawhnu dar 3 ral hmaa Samagra SPD hnena attendance report thehlut turin a hriattir a ni.