KHAWTHLIR

Sorkar laipui chuan DoNER ministry vil turin member 15 awmna Consultative Committee for the Ministry of Development of North Eastern Region a ruat thar a, Mizoram Lok Sabha MP C Lalrosanga leh Rajya Sabha MP Ronald Sapa Tlau te an tel. He committee-ah hian DoNER minister Dr Jitendra Singh chu chairman a ni.

Mission Foundation Movement (MFM) chuan Project Implementing Agency (PIA), Start-up Village Entrepreneurship Programme (SVEP) hnuaiah November 19-21 chhung khan community resource person - enterprise promotion mi 12-te pualin SIRD, Kolasib-ah training an buasaih. SVEP hi National Rural Livelihood Programme hnuaia mi niin, pilot project atan Kolasib district leh Serchhip district thlan a ni a, Kolasib district-a hma la turin MFM thlan a ni.

Mizoram University-a Department of Econo­mics chuan nimin khan kum 40-na, ruby jubilee an lawm a, MZU pro-vice chancellor Prof. RP Vadhera-in a hmanpui. Department of Econo­mics hi NEHU hun lai (NEHU Mizoram campus) kum 1979-a department hawn hmasak ber pathum zinga pakhat a ni a (English, Education & Economics). Tun thlengin Department of Economics aṭang hian Ph.D hmu mi 32, M.Phil hmu mi 52 an awm tawh a ni.

Independent member Lalchhuanthanga zawhna chhangin Home minister Lalchamliana chuan Assam sorkarin NRC final list a tihchhuah hnuin foreigner Mizo­rama rawn luh tum an awm report a awm loh thu a tarlang a, "Amah­erawhchu foreigner, visa leh passport nei, Assam aṭanga lokal ni lo chu dan an ni lo," a ti.