FEMSE lungawi lohna lantir chungchang Education Minister-in House-ah a sawifiah

School Education minister Lalchhandama Ralte chuan, Federation of Mizoram Samagra Employees (FEMSE) thil phût chungchanga an hmalaknate nimin khan Assembly session-ah Speaker-in a sàwm angin a sawifiah.

School Education Minister chuan, FEMSE hnuaia thawktute'n an thil phût chungchanga lungawi lohna lantir an tum thu sawiin, "RMSA leh SSA a hranin an awm ṭhin a, Samagra hnuaiah an awm tawh. FEMSE pawh hi tun thla tìra piang chhuak a ni a, an hmalakna hmasa kan hmuh hmasak ber chu tun ṭum hi a ni," a ti.

Lalchhandama Ralte chuan, FEMSE chuan an hlawh tihpun leh zirtirtu lakah 70% an tana reservation siam an phût ni âwma a hriat thu sawiin, "Hemi tur hian sum tam tak a ngai a ni. November 20, 2019 hmaa an thil phût tihhlawhtlin an phût a, an thil phût hi Chief Minister an pe lo a, kei pawh min pe lo," a ti a; an chhui chian hnuah an ultimatum chu Assembly Speaker hnenah pein, copy to-ah School Education Secretary an pe tih an hriat thu a sawi.

Mass casual leave lak an tum chu sorkarin a ngaih thutak thu sawiin Lalchhandama chuan, "Sawiho tura tih pawh awm hmaa exam dawna mass casual leave lak an ti hi sorkarin a ngaih serious avangin 'No work, no pay' turin order chhuah ve nghal a ni," a ti.

Lalchhandama Ralte chuan, zirtirtu thawk mekte harsatna tawh chu sorkarin a buaipui nia sawiin, "Central lamin sorkar hmasa angin pawisa min pe lo rei tho a, mahse, Chief Minister-in an dinhmun a hrethiam a, Finance department sum pûkte'n an hlawh kan pe ṭhin," a ti a; a senior tawhte dah ngheh dante pawh sawiho a ni tawh niin a sawi.

School Education Minister chuan, SSA leh RMSA zirtirtute chu High Court-ah an zualko tih sawiin, "Sorkar hmasain a enkawl danah an beidawng nge, ṭhahnem an ngaih luat vang, dinhmun ṭha phûtin Court-ah an zualko a ni. Court thu kal lai a ni a, thutlukna siam a nih hma chuan duhsakna pawh an lakah tih theih a ni ta rih lo," a ti.