Arsa paihsakte a man pe turin sorkar phût

ZPM general secretary (Media) Lalmuanpuia Punte chuan nimin khan Aizawl Press Club-ah thuthar thehdarhtute thingpui a inpui a; Vairengte mite arsa Rs. 6,72,000 hù tun hnaia All Mizoram Poultry Farmers Association (AMPFA) nia hriatte'n an paihsak avangin, an sum hloh zat Mizoram sorkarin a pek ngei a ngaia a hriat thu a sawi.

Lalmuanpuia Punte chuan, Vairengte chu kum 2018-a MLA inthlanpuia a dinna bial chhung a nih vangin a ṭan tlat thu sawiin, "Ar chu khawi aṭanga an lak luh pawh ni se, a nungin an lei a, an talh a, an puah a, sa kawchhungte pawh a hlawmin an la a, an tifai a, siam mai theihin an sawngbawl vek a, a hlutna an tihpun hnuah an zuar leh mai a ni. Hetiang hian Vairengtea chhungkaw 200 velin eizawn nan an hmang mek a ni," a ti.

Mizorama sumdawng zawng zawngin ram páwn aṭangin bungrua an lak vek thu leh Mizorama ar vulhtute pawhin ár notê leh ár chaw pawh state páwn aṭanga an lak luh ve tho thu sawiin Lalmuanpuia chuan, "Thâ leh sum tam tak an sèn tawhna, finished product lo paihsak ringawt hi a dik lo hle a ni," a ti a; a paihtute police-in an chhuah leh nghal mai leh sorkar hotute inrawlh nia media hrang hranga lang chu mak a tih thu a sawi.

All Mizoram Poultry Farmers' Association (AMPFA)-in vairam aṭanga dan loa ár lak luh an vei chu vei tur dik a nih thu sawiin Lalmuanpuia chuan, sorkarin sumdawnna chungchangah dan a nei ṭha lo hle niin a sawi a, "Sorkar hian a vei tâwk lo a, a véng zo lo a ni," a ti. Dan palzûta chêt chíngte hrem vat an nih loh chuan Vairengte khuain kawngpui an dan a hlauhawm thu leh Mizoram sorkar chu hma la vat tura a phût thu a sawi bawk.

* A nungin an lei a, hralh theihin an sawngbawl

* Vairengtea chhungkaw 200 vel eizawnna a ni mek

* Ar chang ni lo, thil dang pawh state pawn atanga lakluh a ni

* Sum leh tha sen vek hnua lo paihsak hi a dik lo hle