Vaivakawn-Hunthar Veng kawng a bal

Vaivakawn aṭanga Hunthar Veng panna kawngpui chu a thlang lama leimin ṭhin a min leh avangin nimin chhun khan a bal. Kawngpui hi lirthei ke pali nei tan khâr nghal a ni a, two wheeler-te erawh chu an tlan tlang thei.

Hunthar Venga NH-54 kawngpui chunga lei tlahniam ṭhin chu kum hmasa lam aṭang tawhin a tlak belh zel a, nikum lamah pawh Vaivakawn-Hunthar Veng kawngpui bul maia awm B Sairengpuii in chu ṭhiah a nih mek laiin a lo chim tawh a ni. B Sairengpuii in dinna lei chu tun hnaiah a tlak belh leh a, nimin khan min lehin, a bul maia kawngpui pawh a bal ta a ni.

Kawngpui a bal avang hian he kawngpuiah hian lirthei ke pali nei tan tlân tlang theih a ni lo a, two wheeler-te erawh chu tlan tlangtir an ni. Lirthei tlan dan turah ruahmanna thar siam nghal niin, nimin tlai khan Traffic SP Rodingliana Chawngthu-in hriattirna a tichhuak.

1.    Vaivakawn aṭanga Hunthar Veng Company péng inkarah chhuk leh chho zawngin two wheeler-te chauh tlan phal a ni.

2.    Chanmari West Kâwipui leh Edenthar Veng (Lalsangliana Petrol Pump) inkarah LMV-te chhuk zawng chauha tlan phal a ni.

3.    Emergency leh hmanhmawh thil bikah chuan chhuk zawngin Chanmari West aṭangin Chanmari West YMA Park/Thlanmual Central Road-ah LMV leh two wheeler-te an tlân thla thei ang a; kawng a chhuk ulh avangin kawngpui tlante fimkhur hle tur a ni.

4.    Vaivakawn leh Edenthar Veng via Hunthar Veng, Chanmari West, etc. inkar kawngpui dungah lirthei leh bungrua dah phal a ni lo.