ZPM-in independent MLA-te an chhuang

ZPM chuan thuchhuah siamin, ZPM aṭanga thlan tlin independent MLA-te'n Mizoram mipui dinhmun hrethiam a, legislator (MLA)-te hlawh tihpunna bill an dodal chu lawmawm an tih thu leh an chhuan tak zet thu sawiin, member zingah hlawh tihpun dodal an awm vawi khatna a nih thu an tarlang.

ZPM chuan, Assembly House-a legislator-te hlawh tihpunna bill sawihonaah independent group leader Lalduhoma'n, 'Val Upa Council-te thuràwn an zawm avangin legislator-te hlawh tihpun rawtna hi kan dodal a ni. Rorel lai MNF-in inthlan dawna an lo tiam tawh, chhungkaw tin hnena Rs. 3,00,000 sem an tumte kha han tihlawhtling phawt se, roreltute nawmsakna aiin, mipui nawmsakna dah hmasak ni se,' tia a rawt chu chhuanawm an tih thu an sawi a ni.

Independent group member dang Lal­chhuan­thanga'n, Mizoram mipui retheih dan sawi a, sum harsat vanga hmasawnna hna thawh a harsat em em laia roreltute hlawh tihpun chu àwm a tih loh thu a sawi pawh chhuanawm an tih thu sawiin ZPM chuan, "Rorel lai MNF-in inthlan dawna an thutiam, chhungkaw tin hnena Rs. 3,00,000 a sem hma chuan legislator-te hlawh lo tihpun hi ZPM-in a thlan tlin MLA-te chuan an remtihpui thei lo kha a ropui a, an fakawm hle a ni," an ti.