ICFAI buaina chingfel turin theihtawp kan chhuah - HTE Minister

Higher & Technical Education (HTE) minister Dr R Lalthangliana chuan, ICFAI University, Mizoram buaina chingfel turin theihtawp an chhuah thu, independent MLA Vanlalhlana zawhna chhangin nimin khan House a hrilh.

Dr R Lalthangliana chuan, ICFAI University-ah regular teacher 24 leh visiting faculty 23 an awm thu sawiin, "Department 12 an nei a, zirlai zat chu 431 a ni. ICFAI buaina hi a hma pawhin a awm tho a, March 2019 khan a sosang a ni. An harsatna hi ka hnenah pawh an thehlut a, a theih chin chinah hmalakpui a ni. Private liau liau an ni a, mahse, kan ram chhunga awm an nih avangin a chingfel turin hma kan la a ni," a ti.

HTE Minister chuan, Chief Minister pawhin ICFAI Society, Hyderabad-a thuneitute hnenah DO letter a thawn thu sawiin, "A insawifiah nasa ve khawp mai. Cabinet pawhin a ngaihtuah a, a zir chiangtu tur Chief Secretary kaihhruaina hnuaiah committee din a ni a, anni hian uluk takin an zir chiang a ni," a ti a; state danga ICFAI college pawhin harsatna an tawk niin a sawi.