Sorkarin kawng chhâwng siam ngei a tum - Chief Minister
PWD changtu chief minister Zoramthanga chuan, ni thum awh Legislative Assembly session-ah khan independent member Vanlalhlana zawhna ziaka chhángin, Mizoram sorkarin kawng chhâwng siam ngei a tum thu a tarlang.
Chief Minister chuan, sorkarin kawng chhâwng siam ngei a tum thu tarlangin, "Hemi atan hian hna hmasaah Bawngkawn leh Vaivakawn junction-ahte flyover siam turin Ministry of Housing & Urban Affairs-ah proposal thehluh a ni. Chumi bawhzuina angin Central PWD official-te March 11, 2019-ah lo kalin, site inspection-te an nei a, hma an la chho mek," a ti.
Independent member Dr Vanlalthlana'n, 'Aizawla kawng chhâwng siamna turin central sorkarin Feasibility Study Team a rawn tír tawh em,' tih zawhna chu UDPA changtu deputy chief minister Tawnluia chuan, kawng chhâwng siam turin Central PWD aṭangin Feasibility Study Team March 11, 2019-ah an rawn kal thu leh site inspection an neih tawh thu a tarlang.
Chief Minister chuan independent membr C Lalsawivunga zawhna chhángin, Aizawl - Tuipang NH-54 chu November 1, 2019 khan Mizoram PWD-in NHIDCL kutah a hlan thu a tarlang a, "PWD enkawl tur a nih loh avangin hna ṭan hun tur leh thawk tura harsatna kan hriatpui lo," a ti.
Kawngpui blacktop tlo loh chhan zawhna chhangin Zoramthanga chuan, "Kawngpui blacktop thar hi kum khat êm pawh daih lo vek an ni lo. Kilometre eng emaw zah zinga a ṭhenlai lo chhe hma bik erawh a awm," a ti a; chhe hma bikte chu leiminin a chiah vangte a ni ṭhin thu a tarlang.
Chief Minister tarlan danin, kawngpui blacktop chhe hma tam tak chu original work ni lo, a vaia resurfacing emaw, strengthening tihna sum daih loh vanga patch repair leh seal coat chauha a chhe zual zel tur venna atana thawm ṭhatte a ni ṭhin.
INC member C Ngunlianchunga zawhna chhangin Chief Minister chuan, Lawngtlai - Hrangchalkawn kawng, NH-54 chu Mizoram sorkarin a ṭha vak lo tih a hriat thu a tarlang bawk.