Nikum aiin kuminah thubuai ziah luh a tam

Mizoram police-a DIG (Northern Range) leh DIG (Eastern Range) huapin nimin khan Police Headquarters-a Arya Mess-ah crime review meeting neih a ni a; thla 10 chhung (January-October) bikah nikum aiin kuminah thubuai ziah luh a tam zawk.

Crime review mee­ting hi DIG (NR) Lalbiak­thanga Khiangte leh DIG (ER) Lalhuliana Fanai ten an telpui a; an huam chhunga unit hrang hranga SP-te leh SDPO-te telin, nikum leh kumina January-October chhunga thubuai ziah luh dan zirho a ni. Mihringa sumdawnna (human trafficking), social media hman sual leh ram hmasawn ruala sualna pung zel leh, thil ṭha lo hrang hrang laka  fimkhur tura inzirtirna pawi­mawhziate sawi lan a ni.

Report-a a lan danin, DIG(NR) chhungah district pathum - Aizawl, Mamit leh Kolasib district-te a awm a; January-October, 2018 chhungin IPC leh non-IPC hnuaiah thubuai 1,318 ziah luh a nih laiin, kumin January-October chhunga thubuai ziah luh zat chu 1,762 a tling. Nikum aia kumina thubuai ziah luh a tamna hi 444 (33.68%) a ni.

DIG(ER)-ah district pali - Champhai, Ser­chhip, Khawzawl leh Saitual district-te a awm a; nikum January-October chhungin IPC leh non-IPC hnuaiah thubuai ziah luh zawng zawng 407 a nih laiin, kumin January-October chhungin 290 a ni a, nikum aiin kuminah 117 (28.75%)-in a tlem zawk.

DIG(NR) Lalbiak­thanga Khiangte chuan, ṭhalaite zingah zu leh ruihhlo hmansual a hluar chhoh zel thu leh Mizoram chu ruihhlo tawlhrûkna kawng a nih avangin ramin a tawrh nasat thu a sawi a; ruihhlo dona kawngah Police leh Excise-te'n theihtawp an chhuah reng chungin tihrêm a harsat thu te, YMA, VDP leh pawl dangte nen thâ thlah loa thawhho zel a pawimawh thute a sawi bawk.