HM hoin YMA leh police hotute'n hunpuia mipui himna tur sawiho

Home minister Lalchamliana hoin nimin khan a pisaah Central YMA hruaitute leh Police hotute'n Krismas leh kumthar vuakvêta mipui himna tur leh thlamuang taka hunpui hman theih dan tur an sawiho.

Meeting-ah hian, kum kal taa venhim hna thawh dante thlir letin, kuminah pawh Police leh YMA-te hmalaknain khauh taka venhim hna thawh leh te, zu leh ruihhlo man leh khuahkhirh dan tur te, hâlpuah leh hâlmawi chi hrang hrang hâl lo tura ven leh inzirtir te, naupang silai lem mu nei chi khap tur leh insual leh buaina siamte man leh hrem dan turte an sawiho a ni.

Thil ṭha lo hrang hrang lo luhna kawnga checkgate-ah uluk leh khauh zawka endik leh a ṭul anga police patrol leh YMA duty bul ṭan turin rawtna siam a ni a; khawtlanga tlawmngai pawl duty-te tlawh chhuah leh a ṭul anga ṭanpuina pek te, magistrate leh police duty-te chak taka an thawh leh theihna atana ruahmanna siam ṭha an ti bawk.