Ar chungchangah AMPFA leh VAZA inrem VAZA-in Rs. 6,72,000 an hmu lêt dawn
November 15, 2019-a Lungdai leh Sihphir inkara ar puah sa Rs. 6,72,000 hû inchhuhsak leh inpaihsak chungchangah All Mizoram Poultry Farmers' Association (AMPFA) leh Vairengte Arsa Zuar Association (VAZA) hruaitute chuan November 21, Ningani khan inremna an siam. Hetih lai hian, VAZA member-te chuan an sum hloh ang zat chu sorkar aṭangin an hmu lêt nia thu dawn a ni.
Thu dawn danin, AMPFA leh VAZA hruaitute hi Commerce & Industries Director kaihhruaiin an inbia a; arsa hralhna tur chungchangah inremna an siam a ni. An inrem dan chuan, AMPFA lamin Aizawla bazar pali - New Market, Bawngkawn Bazar, Ramhlun Bazar leh Vaivakawn Bazarahte an arsate an pe ang a; a bak bazar dangah VAZA lamin an pe ve thung ang.
Vairengte aṭanga thu dawn danin, Commerce & Industries Director hoa inbiaknaah hian Vairengte bialtu (Serlui) MLA Lalrinsanga Ralte pawh a tel. VAZA member-te Aizawl leh khawpui dang ṭhenkhata pek tur ar puah sa an thawn, AMPFA mi leh sa nia hriatte'n an lo chhuhsak vanga an sum hloh zat Rs. 6,72,000 chu an hmu lêt dawn a; an member zawng zawngte insem turin Commerce & Industries Director hoa meeting-ah hian Vairengte Joint V/C hruaitute hnenah sum an hlàn nghal a ni.
Vairengte aṭanga thu dawnna chuan, sum chu khawi aṭanga pek nge an hriat loh thu a sawi. AMPFA hruaitute pawhin, pawisa inpek lam chu an hriatpui loh thu an sawi bawk. Meeting-ah hian Vairengte aṭangin Joint V/C chairman K Lalchawimawia leh secretary Lalawmpuia Pautu te, Vairengte Welfare Committee, Aizawl vice chairman Zion Lalremruata te pawh an tel.
Vanglaini palai zawhna chhangin AMPFA president Rokunga chuan, AMPFA-ah member sang chuang an awm thu leh member nghet bik erawh chu 850 vel an awm thu a sawi a, "AMPFA member-te hian tun dinhmunah ar hralh tur 50,000 vel kan nei mek a ni," a ti a; AMPFA member-te'n ar an vulhnaa sum che vêl (pawisa hman leh lak luh) chu kum khatah cheng nuai 50,000 vela an chhût thu a sawi bawk.
Ar vanga buaina leh a kaihhnawih
4 Vairengte atanga VAZA ar thawn chu paihsak an ni
4 VAZA ar man hi Rs 6,72,000 anga chhut a ni
4 AMPFA-in ar paihsaktu hi an member-te an nih an pha lo
4 Sorkar aiawh, Vairengte khawtlang leh VAZA an inbia
4 VAZA-in Rs 6,72,000 hi an hmu let dawn
4 VAZA pawisa hmuh tur hi khawia mi nge hriat a la ni lo